ចំណុចអាទិភាពទាំង ៦ចំណុចនោះ ត្រូវបានលោកបណ្ឌិត ហ៊ុន ម៉ាណែត នាយករដ្ឋមន្ត្រី ប្រកាសណែនាំ ហើយណែនាំទៀត ទៅកាន់រដ្ឋមន្ត្រីការងារថា ត្រូវតែអនុវត្តឱ្យបាន សម្រាប់ជាផលប្រយោជន៍របស់បងប្អូនកម្មករកាត់ដេររបស់យើង។ ជាពិសេសលើចំណុចទី១ គឺការពិភាក្សាប្រាក់ឈ្នួលអប្បបរមា សម្រាប់កម្មករកាត់ដេរ នៅឆ្នាំ២០២៤ គឺត្រូវតែធ្វើឱ្យបាន នៅមុនពិធីបុណ្យភ្ជុំបិណ្ឌ នាខែតុលាខាងមុខ។ ក្នុងនោះ តិច ឬច្រើន ក៏ត្រូវតែឡើងប្រាក់ខែ សម្រាប់កម្មករកាត់ដេរ នៅឆ្នាំ២០២៤។ នេះបើតាមការបញ្ជាក់របស់លោកបណ្ឌិត ហ៊ុន ម៉ាណែត នៅចំពោះមុខមន្ត្រីជាន់ខ្ពស់រាជរដ្ឋាភិបាល និងនៅចំពោះមុខកម្មករកាត់ដេរជិត ២ម៉ឺននាក់ ដោយមានផ្សាយផ្ទាល់តាមកញ្ចក់ទូរទស្សន៍ និងតាមបណ្តាញសង្គម កាលពីព្រឹកថ្ងៃទី២៩ ខែសីហា។
លោកនាយករដ្ឋមន្ត្រី ហ៊ុន ម៉ាណែត៖ ( សំឡេង )
សូមរម្លឹកថា ការលើកឡើងរបស់លោកនាយករដ្ឋមន្ត្រី ហ៊ុន សែន ខាងលើនេះ ត្រូវបានធ្វើឡើង ខណៈដែលការចរចាកំណត់ប្រាក់ឈ្នួលអប្បបរមារបស់កម្មករនិយោជិត ក្នុងវិស័យកាត់ដេរផលិតសម្លៀកបំពាក់ ស្បែកជើង និងផលិតផលធ្វើដំណើរ កាបូប ឆ្នាំ២០២៤ នៅកម្ពុជា កំពុងធ្វើឡើង តាមរយៈយន្តការត្រីភាគី រួមមាន៖ ភាគីរាជរដ្ឋាភិបាល ដឹកនាំដោយក្រសួងការងារ ភាគីនិយោជិត ជាថៅកែរោងចក្រ និងភាគីសហជីព តំណាងកម្មករ។ ក្រុមការងារនេះ នឹងជួបប្រជុំចរចាជាបន្តបន្ទាប់ ៥លើកទៀត ក្នុងយន្តការត្រីភាគី ១សប្តាហ៍ម្តង នៅថ្ងៃទី៤ ខែកញ្ញា និងចុងក្រោយ នៅថ្ងៃទី២ ខែតុលា។
នៅឆ្នាំ២០២៣ នេះ ប្រាក់ខែកម្មករកាត់ដេរ នៅកម្ពុជា ទាបបំផុត ២០០ដុល្លារ គឺឡើងលើសឆ្នាំ២០២២ ដែលមានចំនួន ១៩៤ដុល្លារ។ បើបូកទាំងប្រាក់អត្ថប្រយោជន៍ផ្សេងទៀត ដែលកម្មករនិយោជិត ធ្លាប់ទទួលបាន ជាមធ្យម កម្មករកាត់ដេរម្នាក់ នៅកម្ពុជា ក្នុងឆ្នាំ២០២៣ នេះ ទទួលបានប្រាក់ខែយ៉ាងតិច ពី ២១៧ដុល្លារ ដល់ ២២៨ដុល្លារអាមេរិក ក្នុង ១ខែ៕
