មេប៉ូលិស ជំរុញឲ្យពង្រឹងវិធានការបង្ការ ទប់ស្កាត់ ការញុះញង់ បង្កចលាចលអសន្ដិសុខ និងរំខាន ដល់ពិធីបុណ្យចូលឆ្នាំ ប្រពៃណីជាតិខ្មែរ

កាលពីថ្ងៃទី១១ ខែមេសា អគ្គស្នងការដ្ឋាននគរបាលជាតិ បានរៀបចំកិច្ចប្រជុំ ដើម្បីពង្រឹងសន្ដិសុខ សណ្ដាប់ធ្នាប់សាធារណៈ ក្នុងឱកាសពិធីបុណ្យចូលឆ្នាំថ្មី ប្រពៃណីជាតិ។ ក្នុងកិច្ចប្រជុំ ដែលដឹកនាំដោយលោកនាយឧត្តមសេនីយ៍ នេត សាវឿន អគ្គស្នងការនគរបាលជាតិ បានដាក់ចេញវិធានសំខាន់ៗ សម្រាប់មន្ដ្រីនគរបាល នៅទូទាំងប្រទេស អនុវត្តនៅក្នុងឱកាសពិធីបុណ្យចូលឆ្នាំថ្មី ប្រពៃណីជាតិ ចាប់ពីថ្ងៃទី១៤ ដល់ថ្ងៃទី១៦ ខែមេសា។ នោះគឺការរក្សាការពារសន្ដិសុខ សណ្ដាប់ធ្នាប់សាធារណៈ ជាពិសេសជំរុញពង្រឹងវិធានការបង្ការ ទប់ស្កាត់ ការញុះញង់ បង្កចលាចលអសន្ដិសុខ និងរំខានដល់បុណ្យចូលឆ្នាំថ្មី ប្រពៃណីជាតិខ្មែរ។