ក្នុងលិខិតចុះថ្ងៃទី២៨ ខែមករា ឆ្នាំ២០១៨ លោក សឺន ស៊ូបែរ្តិ៍ លើកឡើងថា ការរំលាយគណបក្សសិទ្ធិមនុស្ស ដោយយោងតាមស្មារតីនៃអង្គប្រជុំរបស់គណៈកម្មាធិការអចិន្ត្រៃយ៍នៃគណបក្សសិទ្ធិមនុស្សកាលពីរសៀលថ្ងៃទី២៨ ខែមករា ឆ្នាំ២០១៨។
លោក សឺន ស៊ូបែរ្តិ៍ បានបញ្ជាក់ក្នុងលិខិតថា “តាមសម័យប្រជុំនៃគណៈកម្មាធិការអចិន្ត្រៃយ៍ គណបក្សសិទ្ធិមនុស្ស ដូចយោងខាងលើ បានសម្រេចជាឯកច្ឆន្ទរំលាយគណបក្សសិទ្ធិមនុស្ស ចាប់ពីថ្ងៃនេះតទៅ”។
សូមរម្លឹកថា គណបក្សសិទ្ធិមនុស្ស ត្រូវបានបង្កើតឡើងដោយលោកកឹមសុខា កាលពីឆ្នាំ២០០៧។ គណបក្សនេះ បានចូលរួមការបោះឆ្នោតជ្រើសតាំងតំណាងរាស្ត្រ កាលពីឆ្នាំ២០០៨ ដោយទទួលបាន ៣ អាសនៈ។ រហូតដល់ឆ្នាំ២០១២ លោកកឹមសុខា បានចូលរួមជាមួយលោកសមរង្ស៊ី បង្កើតគណបក្សសង្គ្រោះជាតិ ហើយគណបក្សសិទ្ធិមនុស្ស បានជ្រើសតាំងលោក សឺន ស៊ូបែរ្តិ៍ ជាប្រធាន។
ជាមួយគ្នានោះ កញ្ញា កឹមមនោវិទ្យា កូនស្រីច្បងរបស់លោកកឹមសុខា បានប្រកាសថា គណៈកម្មាធិការអចិន្ត្រៃយ៍នៃគណបក្សសិទ្ធិមនុស្ស បានសម្រេចរំលាយគណបក្សសិទ្ធិមនុស្ស ដោយឈរលើគោលការណ៍ ៣ យ៉ាង គឺទី១-ដើម្បីបញ្ជាក់ពីជំហរនៃការរួបរួមមិនមានការបែកបាក់របស់អ្នកប្រជាធិបតេយ្យ និងអ្នកជាតិនិយម។ ទី២-មិនធ្វើតាម សេណារីយ៉ូ ដែលគេឲ្យយើងលេងល្បែង ក្រោយពីការរំលាយគណបក្សសង្គ្រោះជាតិ ហើយគេឲ្យើងចែកចានចែកឆ្នាំងទៅនៅផ្ទះចាស់រៀងៗខ្លួននោះទេ។ និងទី៣-គោរពឆន្ទៈរបស់ប្រជាពលរដ្ឋ និងម្ចាស់ឆ្នោតជាង ៣លាននាក់ ដោយនៅជាមួយគណបក្សសង្គ្រោះជាតិ៕
