ជំហានដំបូង នឹងអនុញ្ញាតឱ្យប្រជាជន ទទួលភ្ញៀវរហូតដល់ទៅប្រាំនាក់នៅក្នុងផ្ទះរបស់ពួកគេ ការជួបជុំគ្នានៅខាងក្រៅផ្ទះបានរហូតដល់ទៅ ១០ នាក់ បើកដំណើរការឡើងវិញនូវបណ្ណាល័យ មជ្ឈមណ្ឌលសហគមន៍ សួនកុមារ អាងហែលទឹក មជ្ឈមណ្ឌលផ្សារទំនើប ហាងកាហ្វេ និង ភោជនីយដ្ឋាន ព្រមទាំងការចាប់ផ្តើមការធ្វើដំណើរនៅក្នុងមូលដ្ឋាន និងការធ្វើដំណើរក្នុងតំបន់។
ចំនួនកំណត់នៃការប្រមូលផ្តុំនៅខាងក្រៅផ្ទះនឹងត្រូវបានបង្កើនដល់ ២០ នាក់ ជាមួយនឹងជំហានទី ២។ មានន័យថា កន្លែងដូចជាកន្លែងហាត់ប្រាណ កន្លែងថែសម្ផស្ស រោងកុន និងសារមន្ទីរ អាចបើកដំណើរការឡើងវិញបាន ហើយការធ្វើដំណើរទៅរដ្ឋផ្សេងៗ អាចចាប់ផ្តើមឡើងវិញបាន។
ជំហានទី ៣ នឹងឃើញមានការជួបជុំគ្នារហូតដល់ ១០០នាក់ អនុញ្ញាតឱ្យបើកឡើងវិញនូវកន្លែងដូចជា កន្លែងលក់អាហារតាមផ្សារ food courts ក្លឹបរាត្រី តៀមស្រា និងកន្លែងសូណា ការធ្វើដំណើរឆ្លងរដ្ឋ និងការពិចារណាឲ្យមានការធ្វើដំណើរទៅនូវ៉ែលហ្សេឡង់ កោះប៉ាស៊ីហ្វិក និង ការធ្វើដំណើររបស់និស្សិតអន្តរជាតិ។
លោកម៉ូរីសុនមានប្រសាសន៍ថា គោលដៅនេះគឺដើម្បីឈានទៅមុខគ្រប់ជំហាន និងសម្រេចបាននូវអ្វីដែលលោកហៅថា“ សេដ្ឋកិច្ចសុវត្ថិភាពកូវីដ” "COVID-safe economy នៅខែកក្កដាឆ្នាំនេះ។
៉«វានឹងមានហានិភ័យ។ វានឹងជួបការលំបាក។ វានឹងមានករណីផ្ទុះឡើងវិញ នឹងមានករណីជាច្រើនទៀត ។ មិនមែនអ្វីៗទាំងអស់នឹងដំណើរការទៅតាមផែនការនោះទេ។ វានឹងមានភាពមិនស៊ីចង្វាក់គ្នា។ រដ្ឋទាំងឡាយនឹងត្រូវតែចាត់វិធានការតាមល្បឿនរបស់ពួកគេរៀងៗខ្លួន។ ហើយនិងត្រាប់តាម ធ្វើតាមផែនការ ឱ្យសមទៅនឹងកាលៈទេសៈក្នុងតំបន់របស់ពួកគេ។ វានឹងមានកំហុសឆ្គងដោយអចេតនា ដោយគ្មានសង្ស័យទេ។ គ្មាននរណាម្នាក់ល្អឥតខ្ចោះឡើយ។ គ្រប់គ្នាកំពុងប្រឹងប្រែងអស់ពីសមត្ថភាពរបស់ពួកគេ។»
គណៈរដ្ឋមន្រ្តីជាតិនឹងពិនិត្យឡើងវិញនូវវឌ្ឍនភាពដំណាក់កាលនេះ ជារៀងរាល់ ៣ សប្តាហ៍ម្តង៕
