មនុស្ស៨នាក់បានស្លាប់ និងយ៉ាងហោចណាស់១០នាក់ផ្សេងទៀតរងរបួសនៅក្នុងហេតុការណ៍បាញ់ទាំងកម្រោលមួយនៅក្បែរមជ្ឍមណ្ឌលលក់ទំនិញមួយកន្លែងក្នុងទីក្រុងមុយនិច ភាគខាងត្បូងប្រទេសអាឡឺម៉ង់។
ប៉ូលិសនិយាយថាពួកគេបានរកឃើញសាកសពបុរសម្នាក់ដែលបានសម្លាប់ខ្លួនឯង ហើយនិយាយថា ពួកគេសន្និដ្ឋានថា គេគឺជាអ្នកបាញ់តែម្នាក់គត់នៅក្នុងហេតុការណ៍នេះ។
កាលពីមុននេះបន្តិចពួកគេបានពិព័ណ៌នាហេតុការណ៍នៅក្នុងទីក្រុងធំទីបីនៃប្រទេសនេះ ថាអាចជាការវាយប្រហារភេរវកម្ម ហើយកំពុងតែជំរុញប្រជាជនឲ្យចៀសឆ្ងាយពីទីសាធារណៈ ដោយគេជឿជាក់ថាជនសង្ស័យ៣នាក់ដែលប្រដាប់ដោយអាវុធកំពុងតែរត់គេចខ្លួន។
តំបន់កើតហេតុត្រូវបានបិទ ហើយមធ្យោបាយដឹកជញ្ជូននៅកណ្តាលទីក្រុងនេះក៏ត្រូវបានពន្យារពេលផងដែរ។
សាក្សីដែលបានឃើញហេតុការណ៍ផ្ទាល់ភ្នែកម្នាក់រៀបរាប់យ៉ាងដូច្នេះថា៖
(សំឡេងសាក្សី៖ ខ្ញុំបានលឺវា ដូចជាការដាក់សំឡេងរោទិ៍ ប៊ូម ប៊ូម ប៊ូម ហើយបុរសនោះនៅតែសំលាប់កុមារ ដែលពួកគេមិនបានធ្វើអ្វីនោះទេ។ ក្មេងៗទាំងនោះកំពុងតែអង្គុយញ៉ាំអាហារ។ ពួកគេមិនអាចរត់គេចបានទេ។ ខ្ញុំលឺពាក្យនេះ អាឡា អាបា អាឡា អាបា ។ ខ្ញុំលឺពាក្យនេះ ហើយខ្ញុំបានត្រឹមតែយំប៉ុណ្ណោះ។)
ប្រជាជនកំពុងតែស្ម័គ្រផ្តល់ទីជំរកឲ្យរស់នៅក្នុងផ្ទះរបស់ពួកគេតាមបណ្តាញសង្គម ចំពោះអ្នកដែលស្ថិតក្នុងភាពតែលតោល។
កងកម្លាំងអាឡឺម៉ង់បានស្ថិតនៅក្នុងការប្រុងប្រយ័ត្នខ្ពស់ បន្ទាប់ពីជនស្វែងសុំសិទ្ធិជ្រកកោនម្នាក់បានវាយប្រហារលើមនុស្សដោយប្រើពូថៅនិងកាំបិតក្នុងរថភ្លើងមួយនៅBavaria កាលពីថ្ងៃចន្ទ៕
