SBS បានកំណត់ធ្វើការប្រឹក្សាយោបល់ជាសាធារណៈស្តីពីលក្ខន្តិកដែលដាក់ស្នើឡើងពីការសើរើលើសេវាកម្មវិទ្យុរបស់ខ្លួន។ចាប់ផ្តើមពីថ្ងៃចន្ទទី១៤វិច្ឆិកានេះតទៅ រហូតដល់ថ្ងៃទី១១ធ្នូឆ្នាំ២០១៦ខាងមុខនេះ ប្រិយមិត្តអ្នកស្តាប់ សហគមន៍ និងម្ចាស់ភាគហ៊ុនទាំងអស់នឹងមានឱកាសក្នុងការបញ្ចេញយោបល់របស់លោកអ្នកលើការផ្សាយផ្នែកមាតិកាសំឡេងនិងភាសាបាន។
SBS នឹងចាក់ផ្សាយសេចក្តីជូនដំណឹងដែលថតសំឡេងជាភាសាអង់គ្លេសនិងភាសាផ្សេងៗទៀត ដើម្បីជាការជូនដំណឹងដល់ប្រិយមិត្តអ្នកស្តាប់ស្តីពីការពិនិត្យសើរើសេវាកម្មផ្សាយរបស់វិទ្យុSBS ព្រមទាំងដំណើរការពិគ្រោះយោបល់ជាសាធារណៈនេះ។
លក្ខន្តិកនៃការជ្រើសរើសនេះនឹងត្រូវសម្រេចជាចុងក្រោយក្នុងខែមីនាឆ្នាំ២០១៧ ជាមួយនឹងកាលវិភាគផ្សាយថ្មី ដែលនឹងត្រូវដាក់ចេញនៅមុនដំណាច់ឆ្នាំ២០១៧ខាងមុខនេះ។
សេចក្តីព្រាងនៃលក្ខន្តិកក្នុងការជ្រើសរើសនេះចេញផ្សាយនៅថ្ងៃចន្ទទី១៤វិច្ឆិកា ហើយការផ្តល់ជូននូវមតិយោបល់ត្រឡប់មកវិញនោះ អាចធ្វើបានតាមរយៈគេហទំព័រ៖ sbs.com.au/consultation ៕
Share
