កាសែតថៃ បាងកក ប៉ុស្តិ៍ បានចុះផ្សាយថា នគរបាលស៊ើបអង្កេតបទឧក្រិដ្ឋបច្ចេកវិទ្យាថៃ កាលពីថ្ងៃចន្ទ ទី១៤ ខែកក្កដា ឆ្នាំ២០២៥ បានបញ្ជូនសំណុំរឿង ពាក់ព័ន្ធនឹងការបែកធ្លាយការសន្ទនាតាមទូរស័ព្ទរវាងលោកស្រី Paetongtarn Shinawatra នាយករដ្ឋមន្ត្រីថៃ ដែលត្រូវបានព្យួរតំណែង និងលោក ហ៊ុន សែន ទៅកាន់ការិយាល័យតុលាការថៃ នៅទីក្រុងបាងកក។
កាសែតថៃដដែល បានស្រង់សម្តីអ្នកនាំពាក្យតុលាការថៃ មកផ្សាយថា ព្រះរាជអាជ្ញាតុលាការថៃ នឹងសម្រេចថា តើករណីនេះ មានភស្តុតាងគ្រប់គ្រាន់ ដើម្បីបញ្ជូនទៅតុលាការដែរ ឬទេ។ ប្រសិនបើមានភស្តុតាងគ្រប់គ្រាន់ សំណុំរឿងនឹងត្រូវបានបញ្ជូន ទៅតុលាការព្រហ្មទណ្ឌ ហើយប្រសិនបើជនជាប់ចោទ មិនបង្ហាញខ្លួន មន្ត្រីថៃ នឹងស្នើសុំដីកាចាប់ខ្លួនពីអង្គការប៉ូលិសអន្តរជាតិ Interpol។
