លោក Donald J Trump កើតនៅក្នុងសង្កាត់Queens នៃទីក្រុងញូយ៉កក្នុងឆ្នាំ១៩៤៦។ ឳពុករបស់លោកគឺជាអ្នកអភិវឌ្ឍវិស័យអចលនទ្រព្យដ៏ធំបំផុតមួយក្នុងទីក្រុងញួយ៉កនេះ។
ឳពុកម្តាយរបស់លោកបញ្ចូលមនោគមបន្តិចម្តងៗដល់កូនៗទាំង៥របស់ពួកគេអំពីក្រិត្យក្រមនៃការប្រឹងប្រែងធ្វើការងារ។
ប៉ុន្តែDonald Trump ដ៏ក្មេងខ្ចីពេលនោះនៅរត់លេងក្នុងសាលារៀននៅឡើយ ហើយនៅអាយុ១៣ឆ្នាំ លោកក៏ត្រូវបញ្ជូនឲ្យទៅសិក្សានៅសាលាយោធា ហើយលោកក៏មានការរីកចម្រើនយ៉ាងខ្លាំង។
នៅអាយុ២៥ឆ្នាំ លោកបានទទួលសិទ្ធិមើលខុសត្រូវលើអាជីវកម្មរបស់ឳពុកលោក ហើយលោកបានសាងសង់អាគារខ្ពស់ៗកប់ពពកនៅ Manhattan។
ក្នុងឆ្នាំ១៩៧៧ លោកបានរៀបការជាមួយនឹងតារាបង្ហាញម៉ូដម្នាក់មកពីប្រទេសឆេកូស្លូវ៉ាគី អ្នកស្រី Ivana Winklemyer Zelnickova ហើយពួកគេទទួលបាននូវចំណងដៃកូន៣នាក់។
ជីវិតអាពាហ៍ពិពាហ៍របស់ពួកគេបានឈានដល់ផ្លូវបំបែក ប៉ុន្តែអ្នកស្រីនៅតែលើកសរសើរដល់រូបលោក។
អ្នកស្រីថា៖ “លោកDonald គឺជាមនុស្សលោកដ៏អស្ចារ្យម្នាក់។ លោកផ្តល់ឲ្យ លោកកក់ក្តៅ។ ហើយអ្នកទាំងអស់នោះពួកគេមើលមកគាត់ថាជាពាណិជ្ជករដ៏តឹងរឹងម្នាក់ ដែលគាត់ពិតជាតឹងរឹងមែន ប៉ុន្តែប្រសិនបើអ្នកធ្វើល្អចំពោះគាត់ គាត់នឹងធ្វើលើមកលើអ្នកវិញ។ ប្រសិនបើអ្នកធ្វើមិនល្អចំពោះគាត់នោះទេ អ្នកពិតជាស្លាប់មិនខាន ព្រោះថា មិនយូរមិនឆាប់គាត់នឹងផ្ចាញ់អ្នកវិញមិនខាន”។
ក្នុងឆ្នាំ១៩៨១ លោក Donald Trump បានបើកសម្ពោធនូវអាគារខ្ពស់ឈ្មោះថា Trump Tower បន្ទាប់មកក៏មាន Trump Plazaទៀត។
អ្វីៗមិនបញ្ចប់ត្រឹមនោះនោះទេ នៅមានកាស៊ីណូ និងទីលានវាយកូនហ្គោលជាច្រើនបានបើកសម្ពោធជាបន្តបន្ទាប់ទៀត ហើយពេលនោះប្រាក់ចំណូលរបស់លោកបានលោតផ្លោះពីរាប់លានដុល្លារទៅជារាប់ពាន់លានដុល្លារវិញ។
នៅចុងទសវត្សរ៍ឆ្នាំ១៩៨០ អាពាហ៍ពិពាហ៍ដំបូងរបស់លោកត្រាំបានឈានដល់ផ្លូវបំបែក បន្ទាប់ពីលោកបានជួបជាមួយនឹងនារីបង្ហាញម៉ូដវ័យក្មេងម្នាក់ឈ្មោះថា Marla Maples។
ក្រោយមកលោកក៏បានរៀបការជាមួយនឹងនាងហើយបង្កើតបានកូនស្រីម្នាក់។
ភរិយាទីពីររបស់លោកក៏និយាយពាក្យល្អៗអំពីលោកដែរ។
ចំណែកឯ គំនិតនៃការក្លាយជា លោកប្រធានាធិបតីTrumpនេះ បានលើកឡើងជាលើកដំបូងកាលពី២៨ឆ្នាំមុន នៅពេលដែលលោក Donald Trump កំពុងតែធ្វើយុទ្ធនាការឃោសនាសម្រាប់លោក George Bush Senior។
អ្នកយកព័ត៌មានរបស់NBC ម្នាក់នៅសហរដ្ឋអាម៉េរិកបានសួរលោកនៅក្នុងឆ្នាំ១៩៨៨ថា តើអាចទៅរួចទេដែលថាលោកនឹងឈរឈ្មោះជាបេក្ខជនប្រធានាធិបតីនាពេលអនាគត?
ហើយលោក Trump ឆ្លើយថា “ខ្ញុំគិតថា ខ្ញុំមានឱកាសដ៏ល្អមួយ។ ខ្ញុំមានន័យថា ខ្ញុំចង់ឈ្នះ។ នៅពេលដែលខ្ញុំធ្វើអ្វី ខ្ញុំចង់ឈ្នះ ខ្ញុំចង់ធ្វើឲ្យបានល្អ ហើយខ្ញុំគិតថា ខ្ញុំប្រហែលជាមានឱកាសល្អគួរសម”។
ប៉ុន្តែប៉ុន្មានឆ្នាំក្រោយមក វាជាពេលវេលាដ៏លំបាកសម្រាប់លោក។
លោកបានដាក់ប្រកាសក្ស័យធន៤លើកក្នុងដើមទសវត្សរ៍ឆ្នាំ១៩៩០។
មិនតែប៉ុណ្ណោះ លោកបានទិញអាជ្ញាប័ណ្ណការប្រកួតបវរកញ្ញា Miss Universe ក្នុងឆ្នាំ១៩៩៦ ហើយទើបតែលក់វាវិញកាលពីឆ្នាំមុន។
ហើយបន្ទាប់មកក្នុងឆ្នាំ២០០៤ លោកបានក្លាយជាតួសម្តែងកម្មវិធីទូរទស្ស The Apprentice។
កម្មវិធីនេះបានបន្តធ្វើឡើងបាន១៤ភាគ រួមទាំង៧រដូវកាលនៃកម្មវិធី The Celebrity Apprentice ផងដែរ។
ក្នុងឆ្នាំ២០០៥ លោក Donald Trump បានរៀបការជាមួយនឹងភរិយាទី៣របស់លោក ដែលជាតារាបង្ហាញម៉ូតអ្នកនាង Melania Khauss។
មួយឆ្នាំក្រោយមកពួកគេក៏បង្កើតបាននូវកូនប្រុសម្នាក់។
បន្ទាប់ពីការប្រកាសក្ស័យធនពីរលើកក្នុងឆ្នាំ២០០៤ និង២០០៩មក លោកTrumpក៏បានក្រោកឈរឡើងវិញត្រឡប់មកលេងនូវហ្គេមដ៏ធំបំផុតរបស់លោក។
លោកបានប្រកាសថា លោកនឹងឈរឈ្មោះជាបេក្ខជនប្រធានាធិបតីអាម៉េរិកជាផ្លូវការ ហើយនឹងធ្វើឲ្យប្រទេសនេះអស្ចារ្យម្តងទៀត។
សរុបសេចក្តីមក លោក Donald Trump គឺជាក្មេងមកពីសង្កាត់ Queens ជាអ្នកមានអំណាចខាងវិស័យអចលនទ្រព្យ ជាពាណិជ្ជករដែលក្ស័យធុន ជាមហាសេដ្ឋីរាប់ពាន់លាន ជាតារាសម្តែងកម្មវិធីទូរទស្សន៍ ហើយឥឡូវនេះ គាត់គឺជាប្រធានាធិបតីបន្ទាប់របស់សហរដ្ឋអាម៉េរិក៕
