របាយការណ៍របស់ក្រសួងទេសចរណ៍ បង្ហាញថា ព្រឹត្តិការណ៍អង្គរសង្ក្រាន្ត នៅខេត្តសៀមរាប ចាប់ពីថ្ងៃទី១៣-១៦ មេសា ឆ្នាំ២០១៨ មានភ្ញៀវជាតិ ចំនួន ១,៧៨០,០១៦ នាក់ កើន ១៥.១៦% រីឯភ្ញៀវអន្តរជាតិមានចំនួន ៣៦,៦៩៤ នាក់ កើន ១៤.២៥%។
ដោយឡែក ភ្ញៀវទេសចរ ដើរកំសាន្ត ពេលចូលឆ្នាំនៅ ២៤ ខេត្តក្រុងទៀត ក្នុងរយៈពេល ០៣ថ្ងៃ នៃពិធីបុណ្យចូលឆ្នាំ ចាប់ពីថ្ងៃទី១៤-១៦ ខែមេសា ឆ្នាំ២០១៨ គឺភ្ញៀវជាតិ មានចំនួន ៥,០៨៦,៩៦៤ នាក់ កើនឡើង ២៣% ធៀបនឹងឆ្នាំ២០១៧ មានចំនួន ៤,១៣៥,៤៥៦ នាក់ និងភ្ញៀវអន្តរជាតិមានចំនួន ៨៨,០៤២ នាក់ កើនឡើង ៣៣.៣៧% ធៀបនឹងឆ្នាំ២០១៧ មានចំនួន៦៦,០១១នាក់។
ក្រសួងទេសចរណ៍ ក៏បានគូសបញ្ជាក់ថា ភ្ញៀវទេសចរសរុបពេលចូលឆ្នាំ (រួមទាំងអង្គរសង្គ្រាន្ត ខេត្តសៀមរាប ) មានចំនួន ៥,១៧៥,០០៦ នាក់ កើន ២៣% ធៀបនឹងឆ្នាំ២០១៧ មានចំនួន ៤,២០១,៤៧៦ នាក់។
ដោយឡែក ក្នុងរយៈពេល ៥ថ្ងៃ អំឡុងពេលពិធីបុណ្យចូលឆ្នាំថ្មី ប្រពៃណីជាតិ គិតចាប់ពីថ្ងៃទី១៣-១៧ខែមេសា ឆ្នាំ២០១៨ នៅទូទាំងប្រទេស គ្រោះថ្នាក់ចរាចរណ៍ផ្លូវគោក បានកើតឡើង ៩១ លើក បណ្តាលឲ្យស្លាប់ ៤៧ នាក់ និងរបួស ១៤៣ នាក់។ នេះបើយោងតាមរបាយការណ៍របស់នាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈ នៃអគ្គស្នងការនគរបាលជាតិ។
ក្នុងពិធីបុណ្យចូលឆ្នាំ ប្រពៃណីជាតិ កាលពីឆ្នាំ២០១៧ នៅរយៈពេល ៥ ថ្ងៃដូចគ្នានេះ មានអ្នកស្លាប់ចំនួន ៥៥ នាក់ និងរបួស ២២៦ នាក់ ដោយសារគ្រោះថ្នាក់ចរាចរណ៍ផ្លូវគោក នៅទូទាំងប្រទេស៕
