ថវិកា ៧ម៉ឺនដុល្លារ របស់អង្គការសហប្រជាជាតិ ត្រូវបានប្រគល់ជូនគ្រួសារសពលោកអនុសេនីយ៍ត្រី សួន សំបូរ ដែលបានពលីជីវិតក្នុងតំបន់បេសកកម្ម នៅប្រទេសម៉ាលី កាលពីឆ្នាំ២០១៥។
ពិធីប្រគល់ទទួលលុយសំណងនេះ ត្រូវបានធ្វើឡើង នៅទីស្តីការក្រសួងការបរទេស កាលពីព្រឹកថ្ងៃទី១២ ខែមិថុនា ឆ្នាំ២០១៨ ដោយមានការចូលរួមពីតំណាងអង្គការសហប្រជាជាតិ ប្រចាំកម្ពុជា និងរដ្ឋមន្ត្រីក្រសួងការបរទេសកម្ពុជា លោកទេសរដ្ឋមន្ត្រី ប្រាក់ សុខុន។
លោកអនុសេនីយ៍ត្រី សួន សំបូរ បានពលីដោយជំងឺគ្រុនចាញ់ កាលពីថ្ងៃទី១៣ ខែកញ្ញា ឆ្នាំ២០១៥ នៅសាធារណរដ្ឋម៉ាលី។ ក៏ប៉ុន្តែសំណងដល់ក្រុមគ្រួសារកងទ័ពកម្ពុជា រយៈពេលជិត ៣ឆ្នាំ ទើបប្រគល់ជូននាពេលនេះ ត្រូវបានលោក ប្រាក់ សុខុន ទេសរដ្ឋមន្ត្រី រដ្ឋមន្ត្រីក្រសួងការបរទេសកម្ពុជា បានលើកឡើងថា ដោយសារតែរបាយការណ៍ខុសគ្នាអំពីមូលហេតុនៃការស្លាប់របស់កងទ័ពកម្ពុជារូបនេះ។
( សំឡេងលោក ប្រាក់ សុខុន )
គិតចាប់ពីឆ្នាំ២០០៦ រហូតដល់ខែមិថុនា ឆ្នាំ២០១៨ កម្ពុជាបានបញ្ជូនកម្លាំងមួកខៀវ សរុបចំនួន ៥៤៨៦ នាក់ ក្នុងនោះ មានស្ត្រី ២៥៤ នាក់ ទៅចូលរួមក្នុងបេសកកម្មថែរក្សាសន្តិភាពរបស់អង្គការសហប្រជាជាតិ ក្នុងប្រទេសចំនួន ០៨ រួមមាន៖ សាធារណរដ្ឋស៊ូដង់ ស៊ូដង់ខាងត្បូង ឆាដ អាហ្វ្រិកកណ្តាល លីបង់ ស៊ីរី សាយប្រ៊ីស និងប្រទេសម៉ាលី។ បច្ចុប្បន្ន កម្លាំងមួកខៀវកម្ពុជា ចំនួន ៨១៣ នាក់ ក្នុងនោះ មានស្ត្រីចំនួន ៦១ នាក់ កំពុងបំពេញបេសកកម្ម នៅសាធារណរដ្ឋស៊ូដង់ ស៊ូដង់ខាងត្បូង លីបង់ អាហ្វ្រិកកណ្តាល និងនៅប្រទេសម៉ាលី។
របាយការណ៍បង្ហាញថា ចាប់ពីឆ្នាំ២០១៤ មកដល់ខែមិថុនា ឆ្នាំ២០១៨ កងកម្លាំងកម្ពុជា ចំនួន ៩ នាក់ បានទទួលមរណភាព និងពលីជីវិត ព្រមទាំង ១១ នាក់ រងរបួស ដោយសារជំងឺគ្រុនចាញ់ គ្រោះធម្មជាតិ គ្រឿងផ្ទុះកែច្នៃ ជាពិសេសការវាយប្រហារដោយក្រុមប្រដាប់អាវុធ ក្នុងសាធារណរដ្ឋអាហ្វ្រិកកណ្តាល។
មកទល់នឹងខែមិថុនានេះ អង្គការសហប្រជាជាតិ បានផ្តល់សំណងពលី ដល់កងកម្លាំងមួកខៀវកម្ពុជា ចំនួន ០៧ នាក់។ កងកម្លាំងកម្ពុជាទាំង ៧នាក់ បានពលីជីវិតក្នុងពេលកំពុងបំពេញបេសកកម្ម នៅប្រទេសម៉ាលី និងសាធារណរដ្ឋអាហ្វ្រិកកណ្តាល ចាប់តាំងពីឆ្នាំ២០១៤ និងនៅឆ្នាំ២០១៧៕
