ព្រះភិក្ខុវជិរប្បញ្ញោសាន សុជា និង លោកឧកញ្ញ៉ា វេជ្ជបណ្ឌិត គួច ម៉េងលី ចូលគាល់សម្តេចប៉ាប ហ្វ្រង់ស៊ីស

ព្រះភិក្ខុវជិរប្បញ្ញោសាន សុជា ដែលបច្ចុប្បន្នគង់នៅវត្តសមណគោតមារាម នៅទីក្រុងមែលប៊ន បានធ្វើដំណើរតែអង្គឯងចេញពីប្រទេសអូស្រ្តាលីទៅទីក្រុងរ៉ូមប្រទេសអ៊ីតាលី កាលពីថ្ងៃចន្ទ ទី១៦ ខែមករា ឆ្នាំ២០២៣ ដើម្បីចូលរួមក្នុងដំណើរទស្សនកិច្ចនៅកាន់ទ្វីបអឺរ៉ុប ដែលមានគោលបំណងក្នុងការចែករំលែក និងឆ្លុះបញ្ចាំងអំពីភាពសំខាន់នៃការដឹកនាំបែបសាសានា ក្នុងការផ្លាស់ប្តូរឥរិយាបថ ជាពិសេសតាមរយៈទំនាក់ទំនងសង្គម។ ដំណើរទស្សនកិច្ចដ៏សំខាន់នេះដឹកនាំដោយលោក វីល ខនហ្វឺ ដែលជាបព្វជិតនៃសាសនាគ្រិស្តរបស់ប្រទេសម៉ូណាកូ ប្រចាំនៅកម្ពុជា។ លោកឧកញ្ញ៉ា វេជ្ជបណ្ឌិត គួច ម៉េងលី ក៏ជាបុគ្គលសំខាន់មួយរូបទៀតដែលតំណាងឲ្យប្រទេសកម្ពុជា ។ លើសពីនេះ ក៏មានអ្នកអមដំណើរដែលអញ្ជើញមកពីប្រទេសកម្ពុជានិងសហរដ្ឋអាមេរិក សរុបទាំងអស់ចំនួន ៧ រូប។