ព្រះរាជពិធីបុណ្យអុំទូក បណ្តែតប្រទីប អកអំបុក និងសំពះព្រះខែ រយៈពេល៣ថ្ងៃ បានបិទបញ្ចប់ហើយ កាលពីថ្ងៃទី១៥ខែវិច្ឆិកា។ ពិធីកាត់ខ្សែព្រាត់ជានិមិត្តរូបបិទបញ្ចប់ព្រះរាជពិធីបុណ្យអុំទូកក៏បានធ្វើឡើងនៅទន្លេមុខព្រះបរមរាជវាំង ក្រោមព្រះរាជធិបតីភាពព្រះករុណាព្រះមហាក្សត្រ ព្រមទាំងប្រមុខដឹកនាំព្រឹទ្ធសភា រដ្ឋសភា រាជរដ្ឋាភិបាល និងមន្ត្រីជាន់ខ្ពស់គ្រប់លំដាប់ថ្នាក់។
ក្រោយពីបញ្ចប់ព្រះរាជពិធីបុណ្យអុំទូក រយៈពេល៣ថ្ងៃ កាលពីព្រលប់ថ្ងៃទី១៥វិច្ឆិកា លោក ប៊ូ ជុំសេរី អនុរដ្ឋលេខាធិការក្រសួងអប់រំ យុវជន និងកីឡា និងជាប្រធានអនុគណៈកម្មការបច្ចេកទេសប្រណាំងទូក បានប្រកាសពីរបាយការណ៍ និងលទ្ធផលនៃការប្រណាំងទូកថា នៅឆ្នាំ២០១៦នេះ មានទូកង ចូលរួមសរុបចំនួន ២៥៧ទូក ដោយមានចំណុះ កីឡាករអ្នកអុំទូកសរុប ១៧៧៣៦ នាក់។
ចំណែកលទ្ធផលនៃការប្រណាំងទូករយៈពេល៣ថ្ងៃនេះ ត្រូវបានលោក ប៊ូ ជុំសេរី ប្រកាសថា ទូកគូពិសេស ដែលជាប់លេខ១ ខាងល្បឿនលឿនជាងគេ បានទៅលើទូកងឈ្មោះ “សារាយតេជោសែនជ័យ” មកពីខេត្តកណ្តាល។
(សំឡេងលោក ប៊ូ ជុំសេរី)
បន្ទាប់ពីរបាយការណ៍ និងការប្រកាសពីចំណាត់ថ្នាក់ទូករួចមក ព្រះករុណាព្រះមហាក្សត្រ បានប្រទានរង្វាន់ដល់កីឡាករទូកជ័យលាភី តាមផែននិមួយៗ មុននឹងពិធីកាត់កូនខ្លែងខ្សែព្រាត់ ដោយមានទាំងការបង្ហោះប៉េងប៉ោងផងដែរ។
( សំឡេងប្រកាសពីការប្រគល់រង្វាន់ជូនទូកង )
ពិធីបណ្តែតប្រទីបចំនួន១៣ប្រទីប ដោយមានទាំងការបាញ់កាំជ្រួច ក៏ត្រូវបានធ្វើឡើង យ៉ាងគគ្រឹកគគ្រេង ក្នុងរយៈពេល ៣ថ្ងៃនេះ។
ដោយឡែក មន្រ្តីជាន់ខ្ពស់របស់នាយកដ្ឋាននគរបាលចរាចរណ៍ និងសណ្តាប់ធ្នាប់នៃអគ្គស្នងការនគរបាលជាតិ បានឱ្យដឹង ស្ថានការណ៍រក្សាសន្តិសុខសុវត្ថិភាព និងសណ្តាប់ធ្នាប់ផ្សេងៗ ក្នុងព្រះរាជពិធីបុណ្យអុំទូក បណ្តែតប្រទីប អកអំបុក និងសំពះព្រះខែ រយៈពេល ៣ ថ្ងៃនេះ គឺប្រព្រឹត្តទៅ ដោយមិនមានបញ្ហាអ្វីចោទធំដុំឡើយ។
រីឯលោកវេជ្ជបណ្ឌិត ងី មានហេង ប្រធានមន្ទីរសុខាភិបាល រាជធានីភ្នំពេញ បានឲ្យដឹងថា ក្រុមគ្រូពេទ្យរបស់ក្រសួងសុខាភិបាល ក៏ដូចជាមន្ទីរសុខាភិបាលរាជធានីពេញ បានពិនិត្យ និងព្យាបាលជំងឺ ជូនប្រជាពលរដ្ឋសរុបជិត៦ពាន់នាក់ ក្នុងព្រះរាជពិធីបុណ្យអុំទូករយៈពេល៣ថ្ងៃនេះ។ ប្រជាពលរដ្ឋមកកម្សាន្តព្រះរាជពិធីបុណ្យអុំទូក ភាគច្រើន មានជំងឺវិលមុខ និងឈឺក្បាល ជាដើម។ ក្នុងនោះ ក៏មានអ្នកជំងឺ ដែលត្រូវបញ្ជូនទៅកាន់មន្ទីរពេទ្យ ដូចជា ដាច់ដៃជើង រាក ក្អួត និងលើសឈាម ផងដែរ៕
