വിക്ടോറിയയിൽ കൊറോണവൈറസ് ബാധ കുറഞ്ഞ സാഹചര്യത്തിൽ നിയന്ത്രണങ്ങളിലുള്ള ഇളവ് ചൊവ്വാഴ്ച അർധരാത്രി മുതൽ നിലവിൽ വന്നു.
ഇതിന് പിന്നാലെയാണ് ഫോക്‌നറിലുള്ള ഡൊണാൾഡ്‌സിലെ കൂടുതൽ ജീവനക്കാർക്ക് രോഗം സ്ഥിരീകരിച്ചത്.
മൂന്ന് ജീവനക്കാർക്കാണ് ഇവിടെ നേരത്തെ രോഗബാധയുണ്ടായിരുന്നത്. എന്നാൽ ചൊവ്വാഴ്ച മൂന്ന് പേർക്കും ബുധനാഴ്ച രണ്ട് പേർക്കും കൂടി രോഗം സ്ഥിരീകരിച്ചതോടെ രോഗബാധിതരുടെ എണ്ണം എട്ട് ആയി. ഇതിൽ നാല് പേർ ജീവനക്കാരും മറ്റ് നാല് പേർ ഇതിലൊരാളുടെ ബന്ധുക്കളുമാണെന്നാണ് റിപ്പോർട്ടുകൾ.
ഇതേതുടർന്ന് ഇവിടുത്തെ 92 ജീവനക്കാരെ കൊറോണ പരിശോധനക്ക് വിധേയരാക്കി. രോഗബാധിതരുമായി സമ്പർക്കം പുലർത്തിയവരോട് 14 ദിവസം ക്വാറന്റൈൻ ചെയ്യാൻ ആരോഗ്യ വകുപ്പ് നിർദ്ദേശം നൽകിയിട്ടുമുണ്ട്. ആദ്യ കേസ് റിപ്പോർട്ട് ചെയ്തപ്പോൾ അടച്ചിട്ട റെസ്റ്റോറന്റ് വൃത്തിയാക്കിയതിന് ശേഷം തുറന്നു.
ഇതിനിടെ പടിഞ്ഞാറൻ മെൽബണിലെ ബ്രുക്ലിനിലുള്ള മാംസ സംസ്കരണ കേന്ദ്രമായ സെഡാർ മീറ്റിസിൽ പൊട്ടിപ്പുറപ്പെട്ട രോഗബാധയിൽ WorkSafe അന്വേഷണം ആരംഭിച്ചു. ഈ മാംസ സംസ്കരണ കേന്ദ്രത്തിൽ, ജീവനക്കാർക്ക് സുരക്ഷാ ഉപകരണങ്ങൾ, ഹാൻഡ്‌സാനിറ്റൈസർ തുടങ്ങിയവ നൽകിയിട്ടുണ്ടോ എന്നതും, സാമൂഹിക അകലം പാലിച്ചിട്ടുണ്ടോ എന്നതും വർക്സേഫ് അന്വേഷിക്കും.
സെഡാർ മീറ്റിസിൽ രോഗം ബാധിച്ചവരുടെ എണ്ണത്തിൽ വൻ വർദ്ധനവാണ് രേഖപ്പെടുത്തിയിരിക്കുന്നത്. ഇതിനോടകം 88 പേർക്കാണ് ഇവിടെ രോഗം ബാധിച്ചിരിക്കുന്നത് .
പുതുതായി ഏഴ് പേർക്ക് സംസ്ഥാനത്ത് ബുധനാഴ്ച രോഗം സ്ഥിരീകരിച്ചു. ആകെ 1,514 പേർക്കാണ് രോഗം ബാധിച്ചിരിക്കുന്നത്. ഇതുവരെ 273,000 ലേറെ പേരെ പരിശോധനക്ക് വിധേയരാക്കിയിട്ടുണ്ട്.
ന്യൂ സൗത്ത് വെയിൽസിൽ ഒരു സ്കൂൾ അടച്ചു
സിഡ്‌നിയിലെ ഒരു സ്കൂളിൽ രോഗം കണ്ടെത്തിയതിനെത്തുടർന്ന് സ്കൂൾ അടച്ചിട്ടു. പടിഞ്ഞാറൻ സിഡ്‌നിയിലെ വെറിംഗ്ടൺ പബ്ലിക് സ്കൂളിലെ ഒരു ജീവനക്കാരന് രോഗം സ്ഥിരീകരിച്ചതോടെയാണ് സ്കൂൾ അടച്ചത്. രോഗബാധിതനുമായി സമ്പർക്കം പുലർത്തിയ വിദ്യാര്ഥികളും ജീവനക്കാരും ഐസൊലേറ്റ് ചെയ്യാൻ ആരോഗ്യ വകുപ്പ് നിർദ്ദേശം നൽകി.
എന്നാൽ ബുധനാഴ്ച രാത്രി എട്ട് മണി വരെയുള്ള 24 മണിക്കൂറിൽ നാല് പേർക്കാണ് സംസ്ഥാനത്ത് പുതുതായി രോഗം സ്ഥിരീകരിച്ചത്.
സംസ്ഥാനത്ത് ബുധനാഴ്ച ഒരു മരണം കൂടി റിപ്പോർട്ട് ചെയ്തു. ക്രൂസ് കപ്പലായ റൂബി പ്രിൻസസ്സിലെ 81 വയസ്സുള്ള യാത്രക്കാരിയാണ് ബുധനാഴ്ച മരിച്ചത്. ഇതോടെ രാജ്യത്ത് കൊറോണവൈറസ് ബാധിച്ച് മരിച്ചവരുടെ എണ്ണം 98 ആയി. ന്യൂ സൗത്ത് വെയിൽസിൽ മാത്രം 47 പേരാണ് ഇതുവരെ മരണമടഞ്ഞിരിക്കുന്നത്.
സംസ്ഥാനത്ത് ബുധനാഴ്ച 9,747 പേരിലാണ് പരിശോധന നടത്തിയത്.
People in Australia must stay at least 1.5 metres away from others. Check your state’s restrictions on gathering limits. Testing for coronavirus is now widely available across Australia.
If you are experiencing cold or flu symptoms, arrange a test by calling your doctor or contact the Coronavirus Health Information Hotline on 1800 020 080. The federal government's coronavirus tracing app COVIDSafe is available for download from your phone's app store.
SBS is committed to informing Australia’s diverse communities about the latest COVID-19 developments. News and information is available in 63 languages at sbs.com.au/coronavirus.
