മെൽബണിൽ വീണ്ടും കൊറോണ വ്യാപനം രൂക്ഷമായതോടെ അവശ്യസന്ദര്‍ഭങ്ങളില്‍ മാത്രമേ വീട്ടിൽ നിന്ന് പുറത്തിറങ്ങാവൂ എന്നാണ് സർക്കാർ നിർദ്ദേശം നൽകിയിരിക്കുന്നത്.
ഈ നിർദ്ദേശം ലംഘിക്കുന്നവർക്ക് കഠിന പിഴ ഈടാക്കുമെന്നും സർക്കാർ അറിയിച്ചിരുന്നു.
ഇതിനിടെയാണ് ബട്ടർ ചിക്കൻ വാങ്ങാൻ വേണ്ടി മാത്രം ഒരു മെൽബൺകാരൻ 32 കിലോമീറ്റർ യാത്ര ചെയ്തത്. ഇദ്ദേഹത്തിൽ നിന്ന് ശനിയാഴ്ച 1,652 ഡോളർ പിഴ ഈടാക്കിയിരുന്നു. അതായത് ഒരു ബട്ടർചിക്കന് ഇദ്ദേഹം നൽകേണ്ടി വന്ന വില 1,652 ഡോളറാണ്.
മെൽബണിലെ കൊറോണ നിയന്ത്രണം ലംഘിച്ചതിനാണ് പിഴ.
പടിഞ്ഞാറൻ മെൽബണിലെ വെറിബിയിൽ നിന്ന് മെൽബൺ നഗരത്തിലേക്ക് ഡ്രൈവ് ചെയ്താണ് ഇദ്ദേഹം ശനിയാഴ്ച ബട്ടർ ചിക്കൻ വാങ്ങാൻ പോയത്.
ഇത് വലിയ രീതിയിൽ ചർച്ചയായതോടെ ഇദ്ദേഹത്തിന് ജീവിതകാലം മുഴുവൻ സൗജന്യമായി ബട്ടർ ചിക്കൻ കഴിക്കാവുന്ന വിധത്തിലുള്ള വാഗ്ദാനങ്ങളുമായി രംഗത്തെത്തിയിരിക്കുകയാണ് ചില ഇന്ത്യൻ റസ്റ്റോറന്റുകൾ.
മെൽബൺ നഗരത്തിലെ ദേശി ധാബയാണ് ഇദ്ദേഹത്തിന് പ്രിയപ്പെട്ട ബട്ടർ ചിക്കൻ ഒരു വർഷത്തേക്ക് സൗജന്യമായി നൽകാമെന്ന് വാഗ്ദാനം ചെയ്‌ത്‌ രംഗത്തെത്തിയ ഒരു റെസ്റ്റോറന്റ്. സംഭവവുമായി ബന്ധപ്പെട്ട് ദേശി ധാബ പരസ്യവും നൽകിയിട്ടുണ്ട്.
ഇതിന് പുറമെ മറ്റൊരു റെസ്റ്റോറന്റും സൗജന്യ ബട്ടർ ചിക്കൻ വാഗ്ദാനം ചെയ്തിട്ടുണ്ട്.
മെൽബൺ നഗരത്തിലെ ടോംഗ എന്ന ഇന്ത്യൻ റെസ്റ്റോറന്റ് ഇദ്ദേഹം അടച്ച പിഴയായ 1,652 ഡോളർ വിലമതിക്കുന്ന ബട്ടർ ചിക്കൻ നൽകാമെന്ന് പറഞ്ഞുകൊണ്ടാണ് രംഗത്തെത്തിയിരിക്കുന്നത്.
റെസ്റ്റോറന്റിന്റെ കണക്ക് പ്രകാരം 61 ഓർഡറുകൾ ഇദ്ദേഹത്തിന് ചെയ്യാം. ഇത് വഴി ജീവിതകാലം മുഴുവൻ ബട്ടർ ചിക്കൻ കഴിക്കാമെന്നാണ് റെസ്റ്റോറന്റിന്റെ കണക്കുകൂട്ടൽ.
വെറിബിയിൽ നിന്നൊരാൾ തങ്ങളുടെ റെസ്റ്റോറന്റിലേക്ക് ബട്ടർ ചിക്കൻ വേണമെന്നാവശ്യപ്പെട്ട് വിളിച്ചിരുന്നെന്നും, പിഴ ലഭിച്ച 'മിസ്റ്റർ ബട്ടർ ചിക്കൻ' ആരാണെന്നും ചോദിച്ച് ടോംഗ റെസ്റ്റോറന്റ് സമൂഹമാധ്യമത്തിൽ പോസ്റ്റ് ഇട്ടിരുന്നു.
ബട്ടർ ചിക്കൻ വാങ്ങാൻ പോയയാൾക്ക് പിഴ ലഭിച്ചെന്ന് വാർത്ത പുറത്തുവന്നതോടെ ഇത് സമൂഹമാധ്യമത്തിൽ ചർച്ചയായിരുന്നു.
താൻ താമസിക്കുന്ന പ്രദേശത്തെ റെസ്റ്റോറന്റുകളെല്ലാം അടഞ്ഞുകിടന്നതോടെയാണ് 32 കിലോമീറ്റർ ഡ്രൈവ് ചെയ്‌ത്‌ ബട്ടർ ചിക്കൻ വാങ്ങാൻ പോയതെന്ന് ഇദ്ദേഹം മാധ്യമങ്ങളോട് പറഞ്ഞു.
സംസ്ഥാനത്ത് കൊറോണ നിയന്ത്രണം ലംഘിച്ചതിന്റെ പേരിൽ നൂറുകണക്കിന് പേർക്കാണ് പിഴ ലഭിക്കുന്നത്. ശനിയാഴ്ച മാത്രം പിഴ ലഭിച്ച 74 പേരിൽ ഒരാളാണ് ഇദ്ദേഹം.
രോഗ വ്യാപനം രൂക്ഷമായ ഏപ്രിലിൽ നിയന്ത്രണം ലംഘിച്ച് വീട്ടുമുറ്റത്തു ക്രിക്കറ്റ് കളിച്ച ഒരു കൂട്ടം ഇന്ത്യൻ വംശജരിൽ നിന്ന് 1,652 ഡോളർ വീതം പിഴ ഈടാക്കിയിരുന്നു.
Residents in metropolitan Melbourne are subject to stay-at-home orders and can only leave home for food and essential supplies, work, study, exercise or care responsibilities. People are also advised to wear masks in public.
People in Australia must stay at least 1.5 metres away from others. Check your state’s restrictions on gathering limits.
If you are experiencing cold or flu symptoms, stay home and arrange a test by calling your doctor or contact the Coronavirus Health Information Hotline on 1800 020 080.
