Highlights
- ജൂലൈക്ക് ശേഷം മെൽബണിൽ രാജ്യാന്തര വിമാനങ്ങൾ എത്തി തുടങ്ങി
- എട്ട് വിമാനങ്ങൾ തികളാഴ്ച എത്തും
- ക്വാറന്റൈൻ ഹോട്ടൽ പദ്ധതി പരിഷ്കരിച്ച ശേഷമാണ് ഇത് പുനരാരംഭിച്ചത്
വിക്ടോറിയയിൽ കൊറോണവൈറസ് രണ്ടാം വ്യാപനം പൊട്ടിപ്പുറപ്പെട്ട ജൂലൈ പത്തിനാണ് അവസാനമായി രാജ്യന്തര വിമാനങ്ങൾ എത്തിയത്.
അഞ്ച് മാസങ്ങൾക്ക് ശേഷം ആദ്യമായാണ് സംസ്ഥാനത്തേക്ക് രാജ്യാന്തര വിമാനങ്ങൾ എത്തുന്നത്.
കൊളംബോയിൽ നിന്നുള്ള ശ്രീലങ്കൻ എയർലൈൻസ് വിമാനമാണ് തിങ്കളാഴ്ച രാവിലെ എട്ട് മണിയോടെ മെൽബണിലെത്തിയത്. 253 യാത്രക്കാരുമായാണ് വിമാനം എത്തിയത്.
എട്ട് വിമാനങ്ങളാണ് തിങ്കളാഴ്ച മെൽബൺ വിമാനത്താവളത്തിലെത്തുന്നത്. സിംഗപ്പൂർ, ടോക്കിയോ, ഓക്ക് ലാൻഡ്, ഹോംഗ് കോംഗ്, മനില, ദോഹ എന്നിവിടങ്ങളിൽ നിന്നാണ് ഈ വിമാനങ്ങൾ.
ജൂലൈയിൽ ക്വറന്റൈൻ ഹോട്ടലിൽ ജീവനക്കാരിൽ നിന്ന് രോഗം പടർന്നതോടെ ഹോട്ടൽ ക്വാറന്റൈൻ പാളിച്ചകളെ ചൊല്ലിയുള്ള വിവാദങ്ങൾ രൂക്ഷമായിരുന്നു.
ഇതേതുടർന്ന് സംസ്ഥാനത്ത് ഹോട്ടൽ ക്വാറന്റൈൻ നിർത്തിവയ്ക്കുകയും അന്വേഷണം നടത്തുകയും ചെയ്തിരുന്നു.
എന്നാൽ ഹോട്ടൽ ക്വാറന്റൈൻ അന്വേഷണത്തിന്റെ ഭാഗമായുള്ള ശുപാർശകളുടെ അടിസ്ഥാനത്തിൽ മാറ്റങ്ങൾ വരുത്തിക്കൊണ്ടാണ് മെൽബണിലെ ക്വാറന്റൈൻ ഹോട്ടൽ പുനരാരംഭിച്ചിരിക്കുന്നത്.
മെൽബണിലെ 11 ഹോട്ടലുകളിലായിട്ടാണ് യാത്രക്കാരെ താമസിപ്പിക്കുന്നത്.
പദ്ധതി കാര്യക്ഷമമായി നടപ്പിലാക്കാൻ 170ലേറെ പ്രതിരോധന സേനാ അംഗങ്ങളെയാണ് സർക്കാർ വിന്യസിച്ചിരിക്കുന്നത്.
വിക്ടോറിയ പൊലീസിനാണ് ക്വാറന്റൈൻ ഹോട്ടലിന്റെ സുരക്ഷയുമായി ബന്ധപ്പെട്ട എല്ലാ കാര്യങ്ങളുടെയും ചുമതല.
കൊവിഡ്-19 ക്വാറന്റൈൻ വിക്ടോറിയ എന്ന പുതുതായി രൂപീകരിച്ച എജൻസിക്കാണ് പരിഷ്കരിച്ച ക്വറന്റൈൻ ഹോട്ടൽ പദ്ധതിയുടെ ചുമതല. പുതുക്കിയ പദ്ധതിയിൽ സ്വകാര്യ സുരക്ഷാ ജീവനക്കാരെ നിയമിക്കില്ലെന്നും സർക്കാർ അറിയിച്ചിട്ടുണ്ട്.
രാജ്യാന്തര വിമാനങ്ങളിൽ എത്തുന്നവരെ വിമാനത്താവളങ്ങളിൽ നിന്ന് നേരിട്ട് ക്വാറന്റൈൻ ഹോട്ടലിലേക്ക് കൊണ്ടുപോകും.
ക്വാറന്റൈൻ കാലാവധി തീരും വരെ ഇവർക്ക് മുറി വിട്ട് പുറത്തിറങ്ങാൻ അനുവാദമില്ല.
14 ദിവസത്തെ ക്വാറന്റൈനിനായി 3,500 ഡോളറാണ് യാത്രക്കാർ നൽകേണ്ടത്.
ഹോട്ടൽ ജീവനക്കാരെ ദിവസവും പരിശോധനക്ക് വിധേയരാക്കുമെന്നാണ് അധികൃതർ അറിയിച്ചിരിക്കുന്നത്.
സംസ്ഥാനത്ത് 38 ദിവസങ്ങളായി രോഗബാധയൊന്നും റിപ്പോർട്ട് ചെയ്തിട്ടില്ല. ഇതേതുടർന്ന് നിയത്രണങ്ങളിൽ സർക്കാർ കൂടുതൽ ഇളവുകൾ പ്രഖ്യാപിക്കുകയും ചെയ്തിട്ടുണ്ട് .
People in Australia must stay at least 1.5 metres away from others. Check your jurisdiction's restrictions on gathering limits.
If you are experiencing cold or flu symptoms, stay home and arrange a test by calling your doctor or contact the Coronavirus Health Information Hotline on 1800 020 080.
Please check the relevant guidelines for your state or territory: NSW, Victoria, Queensland, Western Australia, South Australia, Northern Territory, ACT, Tasmania
