ഓസ്‌ട്രേലിയയിൽ കൊറോണവൈറസ് മൂലം സാമ്പത്തിക പ്രതിസന്ധി നേരിടുന്ന രാജ്യാന്തര വിദ്യാർത്ഥികൾക്ക് വിവിധ സംസ്ഥാനങ്ങളിലെ സർവ്വകലാശാലകൾ സാമ്പത്തിക പാക്കേജുകൾ പ്രഖ്യാപിച്ചിരുന്നു.
സ്റ്റുഡന്റ് ഹാർഡ്ഷിപ് സപ്പോർട്ട് പാക്കേജിന്റെ ഭാഗമായി 110 മില്യൺ ഡോളറിലേറെയാണ് സാമ്പത്തിക ബുദ്ധിമുട്ടുകൾ നേരിടുന്ന രാജ്യാന്തര വിദ്യാർത്ഥികൾക്ക് സർവ്വകലാശാലകൾ പ്രഖ്യാപിച്ചിരിക്കുന്നത്.
ഇതിന് പിന്നാലെയാണ് സാമ്പത്തിക പ്രതിസന്ധിയിലായ രാജ്യാന്തര വിദ്യാർത്ഥികൾക്ക് പിന്തുണ നൽകുക എന്ന ലക്ഷ്യത്തോടെ സൗത്ത് ഓസ്ട്രേലിയ സർക്കാർ ഇന്റർനാഷണൽ സ്റ്റുഡന്റ് സപ്പോർട്ട് പാക്കേജ് പ്രഖ്യാപിച്ചത്.
സൗത്ത് ഓസ്‌ട്രേലിയന്‍ സര്‍വകലാശാലകളില്‍ എൻറോൾ ചെയ്തിട്ടുള്ള വിദ്യാര്‍ത്ഥികള്‍ കൊറോണവൈറസ്ബാധ മൂലം സാമ്പത്തിക പ്രതിസന്ധി നേരിടുകയാണെങ്കില്‍ പാക്കേജിനായി അപേക്ഷിക്കാം. സംസ്ഥാനത്ത് തന്നെ ജീവിക്കുന്ന വിദ്യാര്‍ത്ഥികള്‍ക്കായിരിക്കും സഹായത്തിനുള്ള അര്‍ഹത.
സംസ്ഥാനത്തെ രാജ്യാന്തര വിദ്യാർത്ഥികളുടെ വിദ്യാഭ്യാസത്തിന് പിന്തുണ നൽകുന്ന സ്റ്റഡി അഡ്‌ലൈഡ് വഴിയാകും ഈ സാമ്പത്തിക സഹായം നൽകുന്നത്.
മൂന്ന് ഘടകങ്ങളായിട്ടാണ് ഈ പാക്കേജ് പ്രഖ്യാപിച്ചിരിക്കുന്നത്. യൂണിവേഴ്സിറ്റി ഓഫ് അഡ്‌ലൈഡ്, ഫ്ലിൻഡേഴ്‌സ് യൂണിവേഴ്സിറ്റി, യൂണിവേഴ്സിറ്റി ഓഫ് സൗത്ത് ഓസ്ട്രേലിയ എന്നീ സർവ്വകലാശാലകളുമായുള്ള പങ്കാളിത്തത്തോടെയാണ് ഫണ്ട് അനുവദിക്കുന്നത്.
അതായത് 10 മില്യൺ ഡോളറിന്റെ ഫണ്ട് ഈ മൂന്ന് സർവ്വകലാശാലകൾക്കുമായിട്ടാണ് സർക്കാർ വിതരണം ചെയ്യുന്നത്. ഈ സർവ്വകലാശാലകളിൽ എൻറോൾ ചെയ്തിട്ടുള്ള രാജ്യാന്തര വിദ്യാർത്ഥികൾക്ക് അതത് സർവ്വകലാശാലകൾ പണം വിതരണം ചെയ്യുമെന്ന് സൗത്ത് ഓസ്ട്രേലിയ സർക്കാർ അറിയിച്ചു.
മാത്രമല്ല, സംസ്ഥാനത്തെ മറ്റ് സർവകലാശാലകളിൽ പഠിക്കുന്ന സാമൂഹിക നിയന്ത്രണങ്ങൾ ബാധിച്ചിരിക്കുന്ന വിദ്യാർത്ഥികൾക്ക് അടിയന്തര ധനസഹായമായി 500 ഡോളർ വീതം നൽകുമെന്നും സർക്കാർ അറിയിച്ചിട്ടുണ്ട്.
ഇതിന് പുറമെ സംസ്ഥാനത്ത് താമസിക്കുന്ന സ്കൂൾ വിദ്യാർത്ഥികൾക്കും സർക്കാർ ധന സഹായം പ്രഖ്യാപിച്ചിട്ടുണ്ട്. സൗത്ത് ഓസ്‌ട്രേലിയയിലുള്ള കുടുംബങ്ങളോടൊപ്പം താമസിക്കുന്ന വിദ്യാർത്ഥികൾക്കാണ് ധനസഹായം ലഭ്യമാക്കുന്നതെന്ന് സർക്കാർ അറിയിച്ചു.
ഒരു വിദ്യാർത്ഥിക്ക് 200 ഡോളർ വീതമുള്ള ഒറ്റത്തവണത്തെ ധനസഹായം അവർക്ക് താമസ സൗകര്യം ഒരുക്കിയിരിക്കുന്ന കുടുംബങ്ങൾക്ക് നൽകും.
സർക്കാരിന്റെ ഈ സാമ്പത്തിക സഹായത്തിന് അര്ഹരായിട്ടുള്ള വിദ്യാർത്ഥികൾക്ക് ഡിപ്പാർട്ടമെന്റ് ഓഫ് ഹ്യൂമൻ സർവീസസിന്റെ വെബ്സൈറ്റ് വഴി അപേക്ഷ സമർപ്പിക്കാം.
സൗത്ത് ഓസ്‌ട്രേലിയയുടെ സാമ്പത്തിക രംഗം മെച്ചപ്പെടുത്തുന്നതിൽ രാജ്യാന്തര വിദ്യാർത്ഥികൾ വലിയൊരു പങ്കാണ് വഹിക്കുന്നതെന്ന് സംസ്ഥാന ടൂറിസം മന്ത്രി റിഡ്ജ്വെ പറഞ്ഞു. ഇത്തരത്തിൽ 2018-2019 കാലയളവിൽ മാത്രം 1.92 ബില്യൺ ഡോളറാണ് സംസ്ഥാനത്തിന് ലഭിച്ചിരിക്കുന്നതെന്നും അതുകൊണ്ടുതന്നെ പ്രതിസന്ധി ഘട്ടത്തിൽ രാജ്യാന്തര വിദ്യാർത്ഥികൾക്ക് പിന്തുണ നൽകേണ്ടത് ആവശ്യമാണെന്നും അദ്ദേഹം പറഞ്ഞു.
People in Australia must stay at least 1.5 metres away from others and gatherings are limited to two people unless you are with your family or household.
If you believe you may have contracted the virus, call your doctor, don’t visit, or contact the national Coronavirus Health Information Hotline on 1800 020 080.
If you are struggling to breathe or experiencing a medical emergency, call 000.
