ഈ വർഷം ജൂലൈ മുതൽ ആകും മാറ്റങ്ങൾ പ്രാബല്യത്തിൽ വരുക. വർഷം ഇരുപത്തയ്യായിരത്തോളം പേർക്ക് സ്റ്റാന്പ് ഡ്യൂട്ടി ഒഴിവാക്കുന്നതിലൂടെ ആനുകൂല്യം ലഭിക്കുമെന്നാണ് പ്രതീക്ഷിക്കുന്നത്.
പുതിയതായി നിർമ്മിക്കുന്ന വീടുകളോ, ഇതിനകം നിർമ്മിച്ചിട്ടുള്ള വീടുകൾ - അഥവാ എസ്റ്റാബ്ലിഷ്ഡ് വീടുകളോ - വാങ്ങുന്നവർക്ക് ആനുകൂല്യം ലഭിക്കും. ആറു ലക്ഷം മുതൽ ഏഴര ലക്ഷം ഡോളർ വരെയുള്ള വീടുകൾ വാങ്ങുന്നവർക്കും വിലയ്ക്ക് അനുസരിച്ച് സ്റ്റാന്പ് ഡ്യൂട്ടിയിൽ ഇളവുണ്ടാകും.ഇതിനു പുറമേ, വിക്ടോറിയയുടെ ഉൾപ്രദേശങ്ങളിൽ ആദ്യമായി വീട് പണിയുന്നവർക്ക് സർക്കാർ ഏർപ്പെടുത്തിയിരിക്കുന്ന ഫസ്റ്റ് ഹോം ഓണർ ഗ്രാൻറ് നിലവിൽ $10,000 ആണ്. ഇത് $20,000 ആയി ഉയർത്താനാണു തീരുമാനമായത്.
എന്നാൽ ആദ്യമായി വീട് പണിയുന്നവർക്ക് മാത്രമാകും ഇത് ലഭിക്കുക. എസ്റ്റാബ്ലിഷ്ഡ് വീടുകൾ വാങ്ങുന്നവർക്ക് ഈ ആനുകൂല്യം ലഭ്യമാകില്ലെന്ന് സർക്കാർ അറിയിച്ചു.
750,000 ഡോളർ വരെ വിലമതിക്കുന്ന വീടുകൾ പണിയുന്നവർക്കാകും ഈ ആനുകൂല്യം ലഭിക്കുക. 2017 ജൂലൈ ഒന്ന് മുതൽ 2020 ജൂൺ വരെയുള്ള കാലയളവിൽ വീട് പണിയുന്നതിനായുള്ള ഉടമ്പടിയിൽ ഒപ്പിടുന്നവർക്ക് മാത്രമാകും ഇത് ലഭ്യമാകുക.ഫസ്റ്റ് ഹോം ഓണർ ഗ്രാന്ററിലുള്ള ഈ വർദ്ധനവ് ആദ്യമായി വീട് വാങ്ങാൻ തയ്യാറായി നിൽക്കുന്ന 6000 ത്തോളം പേർക്ക് സഹായകരമാകുമെന്ന പ്രതീക്ഷയിലാണ് സർക്കാർ.
എന്നാൽ ഗ്രാന്റിലുള്ള ഈ വർദ്ധനവ് വിപണിയിൽ വീടുകളുടെ വില കുത്തനെ ഉയർത്തുമെന്ന് ഹൗസിങ് ഇൻഡസ്ട്രി അസോസിയേഷൻ ആക്ടിങ് റീജിയണൽ ഡയറക്ടർ കെയ്ത്ത് ബാങ്ക്സ് പറഞ്ഞതായി എ ബി സി റിപോർട്ട് ചെയ്യുന്നു.
