പോസ്റ്റല് ബാലറ്റുകള് എണ്ണുന്നത് രണ്ടാം ദിവസവും തുടരുമ്പോള്, സര്ക്കാര് രൂപീകരിക്കാനാവശ്യമായ ഭൂരിപക്ഷം ലഭിക്കുമെന്ന പ്രതീക്ഷയിലാണ് ലിബറല് പാര്ട്ടി.
ഇനി 72,000 പോസ്റ്റല് ബാലറ്റുകള് കൂടി എണ്ണാനുണ്ട് എന്നാണ് ബുധനാഴ്ച രാവിലെ തെരഞ്ഞെടുപ്പ് കമ്മീഷന് അറിയിച്ചത്.
എട്ടു സീറ്റുകള് ഇപ്പോഴും സംശയത്തില്
ഇതുവരെയുള്ള വോട്ടെണ്ണല് പ്രകാരം, ലിബറല് സഖ്യം 70 സീറ്റുകളും ലേബര് 67 സീറ്റുകളും ഉറപ്പിച്ചു. 76 സീറ്റുകളാണ് ഭൂരിപക്ഷത്തിന് വേണ്ടത്.
എട്ടു സീറ്റുകളാണ് ഇപ്പോഴും സംശയത്തില് തുടരുന്നത്.
ഈ എട്ടു സീറ്റുകളില് കാപ്രികോര്ണിയ, കൗവന്, ഫോര്ഡ്, ഹെര്ബര്ട്ട്, ഹിന്ഡ്മാര്ഷ് എന്നിവിടങ്ങളില് ലേബര് പാര്ട്ടിയും, ചിഷം, ഡംക്ലേ, ഗില്മോര് സീറ്റുകളില് ലിബറല് സഖ്യവും മുന്നിട്ട് നില്ക്കുകയാണ്.
എന്നാല് ഇതില് ചില സീറ്റുകള് കൂടി പിടിച്ചെടുത്ത് 76 തികയ്ക്കാമെന്ന പ്രതീക്ഷയിലാണ് ലിബറല് നേതൃത്വം ഇപ്പോഴും.
ലിബറല് സഖ്യത്തിന് 73 മുതല് 76 വരെ സീറ്റുകള് കിട്ടുമെന്ന് എ ബി സിയുടെ തെരഞ്ഞെടുപ്പ് വിദഗ്ധനായ ആന്റണി ഗ്രീനും ഇന്നു രാവിലെ വിലയിരുത്തി.
