Iċ-Ċensiment tal-2026 se jsir nhar it-Tlieta 11 ta’ Awwissu u kull persuna fl-Awstralja f’dan il-lejl għandha tkun inkluża. L-informazzjoni taċ-Ċensiment tintuża biex nifhmu fejn ngħixu, il-lingwi li nużaw id-dar (inkluż l-Ingliż), l-appoġġ li neħtieġu u kif l-Awstralja qed tinbidel bħala nazzjon. Li tkun inkluż fiċ-ċensiment jgħin biex jiżgura li l-komunità, il-kultura u t-twemmin tiegħek ikunu rappreżentati. Hawn x’għandek bżonn tkun taf dwar kif timla ċ-Ċensiment għad-dar tiegħek.
Punti Ewlenin
- Iċ-Ċensiment huwa obbligatorju għal kulħadd fl-Awstralja fil-lejl taċ-Ċensiment, il-11 ta' Awwissu 2026.
- It-tweġibiet tiegħek jgħinu lil dawk li jipprovdu servizzi jifhmu l-bżonnijiet tiegħek issa u kif dawk il-bżonnijiet jistgħu jinbidlu fil-futur.
- Kull informazzjoni personali li tipprovdi tinżamm sigura u ma tistax tintuża biex tidentifikak.
- Id-dejta taċ-ċensiment tintuża fid-deċiżjonijiet dwar is-servizzi u l-appoġġ li tirċievi l-komunità tiegħek.
- Iċ-Ċensiment sempliċement biex jingħaddu n-nies?
- Min għandu jimla l-formula taċ-Ċensiment?
- X'jiġri jekk ma nkunx id-dar fil-lejl taċ-Ċensiment?
- X'mistoqsijiet isaqsuni?
- X'jiġri jekk nitħasseb dwar kif tintuża l-informazzjoni personali tiegħi?
- Għaliex huwa importanti li tagħti informazzjoni eżatta fiċ-Ċensiment?
- Kif iċ-Ċensiment jgħin lill-komunitajiet multikulturali?
- Tista' tinkiseb għajnuna?
Iċ-Ċensiment sempliċement biex jingħaddu n-nies?
Kull ħames snin, l-Uffiċċju Awstraljan tal-Istatistika (ABS) jgħodd kull persuna u familja fl-Awstralja. Dan huwa ċ-Ċensiment tal-Popolazzjoni u d-Djar, magħruf sempliċement bħala ċ-Ċensiment (Census).
L-informazzjoni miġbura tgħin biex tifforma s-servizzi li tirċievi fiż-żona jew il-komunità lokali tiegħek.
Il-Kelliem Nazzjonali taċ-Ċensiment tal-ABS, Emily Walter, tgħid li ċ-Ċensiment huwa l-akbar ġabra ta’ dejta fl-Awstralja u jipprovdi wħud mill-aktar statistiċi siewja tal-pajjiż.
“Huwa stampa ta’ min aħna u ... juri kif qed ninbidlu maż-żmien,” tgħid hi. “Iċ-Ċensiment jistaqsi mistoqsijiet dwar is-saħħa, l-edukazzjoni, l-isfond kulturali [u] l-impjieg, li kollha jipprovdu stampa rikka tal-kompożizzjoni ekonomika, soċjali u kulturali tal-Awstralja.”
Id-dejta taċ-ċensiment tgħin biex tiżgura li s-servizzi u l-infrastruttura t-tajba jkunu disponibbli għall-individwi, il-familji u l-komunitajiet, fejn u meta jkunu meħtieġa. Dan jinkludi servizzi lingwistiċi, skejjel, kura tas-saħħa, programmi komunitarji, trasport pubbliku u appoġġ tal-issetiljar fl-Awstralja.
Min għandu jimla l-formula taċ-Ċensiment?
Kull persuna fl-Awstralja fil-lejl taċ-Ċensiment, il-11 ta' Awwissu 2026, trid tingħadd.
Il-mili taċ-Ċensiment huwa obbligatorja. Dan ifisser li kull familja trid tipparteċipa u kull persuna trid tingħadd fuq formola taċ-Ċensiment.
"Dan jinkludi studenti internazzjonali, viżitaturi, dawk li jkollhom viża u trabi. Xi nies ma jniżżlux it-trabi fuq il-formola taċ-Ċensiment tagħhom!" tgħid Emily Walter.
Meta timla ċ-Ċensiment għad-dar tiegħek, trid tinkludi lil kull min qed joqgħod fid-dar tiegħek fil-lejl taċ-Ċensiment.
X'jiġri jekk ma nkunx id-dar fil-lejl taċ-Ċensiment?
Jekk tkun barra mill-Awstralja fil-11 ta' Awwissu 2026, m'għandekx bżonn timla ċ-Ċensiment.
Imma jekk tkun qed tivvjaġġa fl-Awstralja, pereżempju biex tikkampja jew toqgħod ma' ħbieb, trid timla ċ-Ċensiment irrispettivament fejn tkun. Iċ-Ċensiment jinkludi mistoqsija dwar fejn normalment tgħix.
M'għandekx għalfejn timla ċ-Ċensiment fil-lejl propju tiegħu, iżda t-tweġibiet tiegħek iridu jirriflettu fejn tkun fil-11 ta' Awwissu 2026. Tista' timla l-formola hekk kif tirċievi l-istruzzjonijiet tiegħek jekk taf fejn se tkun fil-lejl taċ-Ċensiment.
X'mistoqsijiet isaqsuni?
Fil-jiem ta’ qabel il-lejla taċ-Ċensiment, il-biċċa l-kbira tal-familji jirċievu ittra li tispjega kif jimlew il-formola online taċ-Ċensiment. Xi familji jirċievu formola stampata.
Emily Walter tgħid li ċ-Ċensiment jinkludi mistoqsijiet dwar is-saħħa, l-edukazzjoni, l-impjiegi u suġġetti oħra li flimkien ipinġu stampa wiesgħa dwar familja u komunità. “
Mistoqsijiet bħal jekk persuna hix ta’ oriġini Aboriġina u tal-Gżejjer tat-Torres Strait, il-lingwa mitkellma d-dar, il-pajjiż tat-twelid u l-pajjiż tat-twelid tal-ġenituri, l-antenati, ir-reliġjon, is-sena tal-wasla fl-Awstralja, dawn it-tipi ta’ suġġetti.”
X'jiġri jekk nitħasseb dwar kif tintuża l-informazzjoni personali tiegħi?
Hemm salvagwardji fis-seħħ biex jipproteġu l-privatezza tiegħek.
Iċ-Ċensiment mhuwiex dwar individwi, iżda dwar informazzjoni minn madwar il-popolazzjoni kollha.
Iċ-Ċensiment jitlob ismek u l-indirizz tiegħek biex jappoġġja l-kwalità tad-dejta, inkluża dejta preċiża għal żoni differenti. L-ismijiet huma separati minn dettalji oħra fil-proċess.
Legalment m’aħniex permessi li naqsmu d-dejta taċ-Ċensiment ma’ xi ħadd, ma’ xi aġenzija governattiva jew mod ieħor, b’mod li tista’ tidentifika lil xi ħadd.Emily Walter
Dan ifisser li l-informazzjoni li tipprovdi hija kunfidenzjali, tinżamm sigura u ma tistax tintuża biex tidentifikak. Organizzazzjonijiet, inklużi dipartimenti tal-gvern, minbarra l-ABS, ma jistgħux jaċċessaw xi informazzjoni personali li jkun hemm fil-formola taċ-Ċensiment tiegħek.
Id-dejta anonima taċ-Ċensiment tintuża minn gruppi komunitarji, organizzazzjonijiet mingħajr skop ta' qligħ, negozji u gvernijiet.
Welcoming Australia hija waħda minn dawn l-organizzazzjonijiet. Huma jaħdmu ma' gvernijiet lokali, klabbs sportivi, universitajiet u postijiet tax-xogħol madwar il-pajjiż.
Is-CEO ta' Welcoming Australia, Aleem Ali, jispjega għaliex ir-rispons onest tiegħek huwa importanti.
"Jekk ma tirreġistrax il-lingwa tiegħek, il-fidi tiegħek, il-kultura tiegħek, effettivament issir inviżibbli għan-nies li jieħdu deċiżjonijiet fejn jidħlu finanzi."
Għaliex huwa importanti li tagħti informazzjoni eżatta fiċ-Ċensiment?
It-tweġibiet preċiżi għall-mistoqsijiet kollha taċ-Ċensiment jiżguraw li leħnek u l-komunità tiegħek ikunu inklużi meta jippjanaw għall-iskejjel, iċ-ċentri tal-komunità, l-appoġġ lingwistiku u servizzi importanti oħra.
Aleem Ali jħeġġeġ lil kulħadd biex iwieġeb il-mistoqsijiet b'onestà u b'mod preċiż.
Is-sehem tiegħek huwa tassew dwar id-dinjità li tidher, u l-ġenerożità tar-riżorsi li jistħoqqilha l-komunità tiegħek.Aleem Ali
Peter Doukas huwa l-President tal-Federazzjoni tal-Kunsilli tal-Komunitajiet Etniċi tal-Awstralja (FECCA).
Huwa jgħid li organizzazzjonijiet komunitarji bħall-Kunsilli tal-Komunitajiet Etniċi ngħaqdu mal-ABS biex iwasslu l-informazzjoni taċ-Ċensiment f’lingwi diversi, u biex itaffu kwalunkwe tħassib.
“Li niksbu dejta preċiża u ngħinu lin-nies jifhmu li hija parti tassew importanti mill-ħajja ċivika fl-Awstralja huwa ċentrali,” jgħid.
Aleem Ali jgħid li d-dejta taċ-Ċensiment għandha rwol sinifikanti għal Welcoming Australia “... għax tgħinna nappoġġjaw l-organizzazzjonijiet li naħdmu magħhom biex inkunu aktar akkoljenti u inklużivi u biex naħdmu b’mod aktar effettiv ma’... komunitajiet diversi.”
Kif iċ-Ċensiment jgħin lill-komunitajiet multikulturali?
Iċ-Ċensiment għandu impatti reali fuq in-nies.
L-informazzjoni li tipprovdi int tgħin lill-gruppi komunitarji, lin-negozji u lill-gvernijiet jieħdu deċiżjonijiet infurmati dwar it-tipi ta’ servizzi u għajnuna li tirċievi l-komunità tiegħek.
Aleem Ali tgħid li d-dejta taċ-Ċensiment tista’ titqies bħala mappa li turina min aħna bħala nazzjon.
“Pereżempju, meta d-dejta turi numru għoli ta’ nies f’post speċifiku b’profiċjenza baxxa fl-Ingliż, dik l-evidenza tista’ mbagħad tintuża biex... tappoġġja affarijiet bħall-kura tas-saħħa bil-lingwa u bis-servizzi ta’ traduzzjoni fi sptarijiet lokali. Tgħinna wkoll nidentifikaw dak li nistgħu nsejħu komunitajiet moħbija li ħafna drabi jiġu injorati f’konsultazzjonijiet u finanzjament tradizzjonali.”
U meta tara l-istampa ġenerali, hemm tant diversità fil-komunitajiet multikulturali tal-Awstralja li huwa importanti li tkun magħrufa.
“Pereżempju... komunitajiet aktar stabbiliti jista’ jkollhom bżonnijiet uniċi rigward l-appoġġ għall-anzjani, filwaqt li dawk li jaslu ġodda jista’ jkollhom bżonnijiet ta’ appoġġ lingwistiku jew saħansitra xi ħaġa bażika bħal kif jissetiljaw fl-Awstralja u l-iskejjel,” jgħid Peter Doukas.
Tista' tinkiseb għajnuna?
Hekk kif toqrob id-data taċ-Ċensiment, l-ABS qed jaħdem ma’ organizzazzjonijiet, negozji u gruppi komunitarji madwar l-Awstralja biex jiżgura li n-nies ikunu jistgħu jimlew iċ-Ċensiment kullimkien. Dan ikopri żoni urbani, reġjonali u remoti u jiżgura li n-nies li joqogħdu 'l bogħod mid-dar, pereżempju f'lukandi, sptarijiet, postijiet tal-ikkampjar u parkeġġi tal-karavans, ikunu appoġġjati wkoll.
Aleem Ali jgħid li l-ABS se jipprovdi fuljetti, gwidi u riżorsi bil-vidjo f'firxa ta' lingwi.
“Tista’ saħansitra żżur ċentru uffiċjali taċ-Ċensiment li se jitwaqqfu għal għajnuna personalment, u hemm ukoll għajuna bit-telefon permezz taċ-Ċentru ta’ Kuntatt taċ-Ċensiment. U jekk teħtieġ interpretu, tista’ tuża s-servizz Nazzjonali tat-TIS.”
Għalhekk ftakar, il-lejla taċ-Ċensiment hija t-Tlieta 11 ta’ Awwissu. Jekk tkun fl-Awstralja f’dik il-lejla, kun żgur li tiġi inkluż.
Jieħu biss ftit ħin biex timla l-formula taċ-Censiment, iżda l-informazzjoni li tipprovdi tista’ tgħin biex tifforma servizzi u għajnuna għall-komunità tiegħek għas-snin li ġejjin.
Għal aktar informazzjoni dwar iċ-Ċensiment iċċekkja l-websajt taċ-Ċensiment Census website. Għal informazzjoni b'lingwi diversi jew għajnuna, iċċekkja Language support page.
Dan il-kontenut kien ipproduċut fi sħubija mal-Australian Bureau of Statistics.
