Il-kantant Aiden diġà jinsab Vjenna jħejji biex jirrappreżenta lil Malta fil-Eurovision Song Contest
Aiden - Image Head of Media Eurovision Song Contest 2026
Il-kantant Malti Aiden telaq lejn l-Awstrija nhar il-Ħadd fejn diġà qed iħejji biex jirrappreżenta lil Malta fis-70 l-edizzjoni tal-Eurovision Song Contest bil-kanzunetta Bella. Aiden jinsab kburi li wara tant snin, il-kanzunetta tiegħu li biha ser jirrappreżenta lil Malta tinkludi l-lingwa Maltija.
Aiden: Ngħidha kif inhi l-ewwel ħaġa, onorat li saret qisha xi ħaġa ħa nsejħilha hekk trendy. Ħa ngħid hekk għax ma nafx x'inhi l-kelma bil-Malti eżatta. Il-fatt li nara kantanti oħra, kantanti żgħażagħ bħali illi qegħdin jinkorporaw il-Malti mal-Ingliż, nara xi ħaġa veru friska, jiġifieri xi ħaġa moderna.
Aiden: Ovvjament hija iżjed faċli li jkollok diska kanzunetta kollha bl-Ingliż jew kollha bil-Malti, però nemmen illi f'dan il-kuntest, pereżempju fuq din il-pjattaforma tal-Eurovision, li tħallat il-lingwi, fil-każ tagħna kif jafu n-nies ż-żewġ lingwi uffiċjali ta' pajjiżna huma l-Malti u l-Ingliż, inħoss illi l-messaġġ jista' jasal ftit iżjed. Għax kif għedt tajjeb inti Joe, mhux kulħadd jista' jifhem il-Malti, jiġifieri apparti l-Maltin li jgħixu Malta u dawk illi jgħixu f'pajjiżi minn madwar id-dinja, huma ftit li jitkellmuh il-Malti u li jifhmuh.
Aiden: Jiġifieri jekk qed ngħidu nies mill-Bulgarija, mill-Albanija, nies miċ-Ċekja, nies mill-Iżvizzera mhux tant ħa jifhmu l-Malti. Għalhekk nemmen illi bl-Ingliż jistgħu jifhmu aħjar, imma mbagħad xorta ħa nagħtuhom laqta Maltija, xorta ħa nagħtuhom doża ta' xi ħaġa lokali. Ħa nuru lin-nies li isma' aħna għalkemm pajjiż żgħir għandna l-lingwa tagħna. Għandek pajjiżi li huma pajjiżi kbar u lanqas għandhom il-lingwa tagħhom. Aħna Malta pajjiż żgħir u għandna l-lingwa tagħna, kemm għandna nkunu kburin. U nixtieq nagħmel spunt ieħor fuq dan li qed, qed nitħaddtu Joe, kemm huwa importanti x-xogħol li tagħmlu intom, jiġifieri minn hawnhekk ħa ngħidlek grazzi kbira u nselli speċjalment għall-Maltin kollha u forsi tfal ta' Maltin illi jgħixu l-Awstralja kemm huwa importanti li nżommu l-lingwa Maltija ħajja. Jiġifieri jiena minn hawnhekk ħa nkun qed niddedika Bella ovvjament lill-Maltin ta' Malta u l-Maltin madwar id-dinja u anke dawk fl-Awstralja.
