L-appoġġ tagħkom ma jonqos qatt. Għalhekk min-naħa tiegħi nwegħedkom li nkompli b’dawn ix-xandiriet, minkejja li s-semmiegħa tar-radju dejjem qegħdin jonqsu, minħabba l-anzjani li jħalluna u n-nuqqas ta’ smigħ bir-radju minn ġenerazzjonijiet ġodda.
Min-naħa l-oħra hemm għadd ġdid ta’ segwaċi li jsegwuwna fuq SBS On Demand u permezz tal-Facebook; għalhekk qed isir aktar sforz għal kontenut ta’ din ix-xorta.
Din is-sena ċċelebrajna għeluq il-50 sena ta’ xandir fuq dan l-istazzjon. Għalkemm il-futur huwa inċert, min-naħa tiegħi nibqa’ nwasslilkom dawn ix-xandiriet bir-radju, sakemm jibqa’ jkun hemm numru sostanzjali ta’ semmiegħa, u l-komunità turi l-bżonn ta’ dawn ix-xandiriet.
Meta nirriflettu dwar is-sena li waslet biex tintemm u n-numru ta’ Maltin u Għawdxin fil-komunità li ħallewna, waqt li naħsbu fihom fit-talb tagħna, inkomplu nħarsu ’l quddiem b’mod pożittiv u niċċcelebraw il-Milied qaddis mal-għeżież tagħna, bil-valuri kollha li jagħmluna Maltin Awstraljani.
Ma ninsewx lil dawk li jinsabu waħdihom u dawk morda. Anke b’sempliċiment telefonata, jew żjara qasira, nuruhom li m’humiex waħidhom.
Il-Milied it-tajjeb lil kulħadd.
Joe Axiaq – Executive Producer – SBS Maltese
