Il-wirt għani tal-komunità Maltija f’Mackay fi Queensland ġie ċċelebrat bl-għarfien uffiċjali tal-Maltese Corner, monument permanenti fi spazju pubbliku li jagħti ġieħ lill-komunità Maltija pijuniera li għenet fl-iżvilupp tar-reġjun.
L-istoriku u kelliema tal-grupp li ħadem biex jitwaqqaf dan il-monument, Carmel Baretta tgħidilna aktar dwar l-istorja li wasslet għal dan il-monument.
Il-monument jinkludi tliet statwi ta’ daqs naturali magħmula mill-bronż li juru lil Emmanuel Camilleri, John Vassallo u Sam Bezzina, ispirati minn ritratt ikoniku meħud fuq il-post fl-1994.
Id-disinn interattiv jistieden lill-viżitaturi joqogħdu ħdejn il-figuri u jimmaġinaw il-konversazzjonijiet li darba kienu jsiru hemmhekk.
Mackay hija meqjusa bħala wieħed miċ-ċentri storiċi tal-issetiljar tal-Maltin fl-Awstralja.
Il-Maltin kellhom sehem importanti fl-iżvilupp bikri tal-industrija tal-kannamieli u għadhom sal-lum jagħtu kontribut qawwi fl-agrikoltura, fin-negozju, fl-isport u fil-ħajja komunitarja.
Il-proġett twettaq mill-Maltese Corner Fundraising Group, li twaqqaf fl-2021 biex imexxi din l-inizjattiva, bl-appoġġ tal-Mackay Regional Council permezz ta’ għotja ta’ $15,000 mill-programm Activate My Place u għotja oħra ta’ $30,000 mill-Community Grants Program Infrastructure and Assets.
L-istoriku u kelliema tal-grupp Carmel Baretta qalet li, minbarra t-tliet statwi tal-bronż, se jiżdiedu wkoll żewġ plakek — waħda tirrakkonta l-istorja tal-Maltese Corner u l-oħra tagħti tagħrif qasir dwar il-Mosta Permanent Building Society, li żviluppat bħala riżultat tar-relazzjonijiet mibnija f’din ir-rokna fil-belt ta’ Mackay.
