Il-ktieb Traditional Sweet Recipes from Malta huwa ktieb ta’ riċetti Maltin li Sharon Spiteri, iddedikat lill-ġenituri tagħha li ġew l-Awstralja, meta hi kienet żgħira. Sharon tkellmet mal-programm Malti tal-SBS u tgħid, li ommha kellha mħabba u passjoni kbira għat-tisjir u kien minn hawn li hija bdiet tieħu interess fit-tisjir.
Il-ħolqien mill-ġdid ta’ dawn ir-riċetti tradizzjonali, jfakkruha fi tfulitha, meta kienet tgħin lil ommha fil-kċina ssajjar. Iż-żjajjar tagħha f’Malta, fejn għamlet ukoll l-istudju tagħha fit-tisjir komplew ix-xewqa tagħha li tiġbor dak il-ħelu li ommha kienet issajjar fi ktieb tar-riċetti li jgħaddi kemm jgħaddi żmien minn fuqhom jibqgħu dejjem popolari u mfittxija minn dawk li jkunu jridu jibqgħu jżommu l-konnessjoni tagħhom ma’ Malta. Sharon tgħid, li l-għan ewlieni ta’ dan il-ktieb huwa li tkun fejn tkun fid-dinja, dejjem ikollok parti minn Malta miegħek.
Mistoqsija jekk għanhiex il-ħsieb li tiġbor u tippubblika riċetti oħra ta’ tisjir Malti, Sharon ma eskludiex li tista’ tagħmel dan fil-futur.
