د ۲۰۱۹ کال په جولای میاشت کې د آسټرالیا د سیالیو او مصرف کونکو کمیسیون د Digital Platforms inquiry په نوم یو راپور خپور کړی وه. په یاد راپور کې راغلي وه چې د ګوګل او فیسبوک کمپنۍ د آسټرالیا په انلاین مارکېټ کې ځانګړی واک لري او په ځینو وختونو کې له دغه واک څخه ناوړه ګټه پورته کوي.
د Digital Platforms inquiry راپور پای کې د سمون په موخه ۲۳ وړاندیزونه هم شوي وه ترڅو د آسټرالیا کاروباریانو او مصرف کونکو دواړو ته ګټه ورسېږي.
له یادې پلټنې څو میاشتې وروسته، د ۲۰۲۰ کال په فبرورۍ میاشت کې د اسټرالیا خزانه دار د آسټرالیا د سیالیو او مصرف کونکو کمیسیون څخه غوښتنه وکړه ترڅو په انلاین مارکېټ کې د اعلاناتو موضوع ته کتنه وکړي او لاس په کار شي ترڅو اصلاحات رامنځ ته شي.
اوسمهال د آسټرالیا حکومت په داسې یوې طرحې کار کوي ترڅو د آسټرالیا رسنیو ته ګټه ورسېږي. د آسټرالیا حکومت غواړي کله چې ګوګل او یا فیسبوک د آسټرالیا د رسنیو خبرونه خلکو ته ښايي نو د هغه بدل کې بايد ورته پیسې ورکړي ترڅو د ګوګل او فیسبوک د ګټې ترڅنګ د آسټرالیا رسنیو ته هم ګټه ورسېږي.
د ګوګل کمپنۍ وايي که چېرې د آسټرالیا حکومت پیشنهاد شوی قانون تصویب کړي نو دوي کېدای شي خپل د لټون ماشین یا ګوګل سرچ خدمتونه په آسټرالیا کې بند کړي او تر هغې وروسته به آسټرالیا بیا د ګوګل صفحې ته لاسرسۍ ونلري.
دا موضوع مو تاسو ته روښانه کړې او لا نور معلومات دلته واورئ.
