په کنبرا کې د افغانستان سفارت وايي چې د آسټرالیا لومړني سفیر، لوییس اچ بورد، د ۱۹۶۹ کال د مارچ په ۳۰مه نېټه په رسمي ډول خپل باورلیک د افغانستان حکومت ته وړاندې کړی.
شاوخوا ۹ کاله وروسته، د ۱۹۷۵ کال د مې په لومړۍ نیټه، ډاکټر علي احمد پوپل، په کنبرا کې خپل باورلیک د آسټرالیا ګورنرجنرال ته وړاندې کړی او په آسټرالیا کې یې د افغانستان د لومړي غیر حضوري سفیر په توګه دنده پیل کړې.
ښاغلی پوپل چې په جاپان کې د افغانستان سفیر هم و، له توکیو څخه به یې چارې پرمخ وړې.
په آسټرالیا کې د افغانستان سفارت د یوې اعلامیې په خپرولو سره ویلي چې "په ۱۹۷۴ کال کې افغانستان ته د آسټرالیا د ګورنر جنرال جان کر" له سفر وروسته د دواړو هېوادونو ترمنځ اړیکو ته لاره هواره شوې ده.
د سفارت په اعلامیې کې راغلي: "د دې ځمکني سفر په جریان کې چې د تورخم له لارې ترسره شوی، هغه [جان کر] له شاهي نظام وروسته د افغانستان له لومړي ولسمشر سردار محمد داوود سره لیدلي او د اړیکو په پیاوړتیا یې خبرې کړي"
"له بده مرغه، د اړیکو دا پړاو په ۱۹۷۹ کال کې پر افغانستان د شوروي له یرغل وروسته ودرېد چې د ډیپلوماتیکو اړیکو د ځنډېدو لامل شو."
په ۲۰۰۱ کال کې د طالبانو د واکمنۍ له ړنګېدو وروسته، محمود صیقل په آسټرالیا کې د افغانستان د لومړني مېشت سفیر په توګه وټاکل شو. ښاغلي صیقل تر ۲۰۰۵ کال پورې په آسټرالیا کې د سفیر په توګه دنده ترسره کړې ده.
په دغې اعلامیې کې همدا راز راغلي: "د افغانستان او آسټرالیا ترمنځ اړیکې له ۲۰۰۱ کال وروسته ژورې شوې. د لوړې کچې لیدنې او ډیپلوماټیکې تبادلې د افغانستان لپاره د آسټرالیا د دوامداره ملاتړ یوه نښه وه، هغه ملاتړ چې په ګډو ارزښتونو ولاړ دی."
"د ۲۰۲۱ کال په اګست کې د طالبانو له بیا واکمنېدو سره، د آسټرالیا د حکومت او دغې ډلې ترمنځ رسمي ډیپلوماټیکې اړیکې وځنډول شوې"
" آسټرالیا د طالبانو رژیم په رسمیت نه پیژني."
"په کنبرا کې د افغانستان د اسلامي جمهوریت سفارت د ۱۹۶۱ کال د ویانا د ډیپلوماتیکو اړیکو له کنوانسیون سره سم خپل فعالیت ته دوام ورکوي او د طالبانو له رژیم څخه په خپلواکه توګه د افغانانو د ګټو خدمت او دفاع ته دوام ورکوي."
د اس بي اس پښتو خپرونه دلته زمونږ پر ویب پاڼه یا هم د اس بي اس پر اپلیکیشن واورئ. تاسو کولای شئ د اس بي اس اپلیکیشن په وړیا توګه له اپل سټور یا ګوګل پلې څخه ترلاسه کړئ.
شریکول
