په آسټرالیا کې د افغانستان سفارت وايي چې "د افغانستان د اسلامي جمهوریت د سیاسي او قونسلي استازولیو د همغږۍ شورا" د پرېکړې پر بنسټ به نن (د سپټمبر ۳مه) په کنبرا کې ملي بیرغ "نیم ځوړند"وي.
دغه پرېکړه د افغانستان په ختیځو ولایتونو کې د وروستۍ زلزلې "د قربانیانو د یاد او دوی ته د درناوي" په موخه نیول شوې ده.
په کنبرا کې د افغانستان سفارت پر خپله فېسبوک پاڼه په یوې خپرې شوې اعلامیې کې ویلي چې خلک کولی شي "د اډګېرنې او خواخوږۍ پیغامونه" دوي ته ایمیل له لارې و استوي.
په اعلامیې کې راغلي: "د افغانستان سفارت په تېرو دوه ورځو کې د ټولو هغو کسانو څخه چې د دغه ملي ناورین له کبله یې په غمشریکۍ کې برخه اخیستې او په دې سختو شرایطو کې د افغانستان د خلکو تر څنګ ولاړ ؤ، د زړه له تله مننه کوي. "
د افغانستان په ختیځو ولایتونو کې د وروستۍ زلزلې له امله ۱۴۱۱ کسان مړه شوي او څه باندې ۳ زره کسان ټپیان شوي دي.
