يوه افغان پيغله روقيه حيدري چې له خپلې کورنۍ سره د اسټراليا ملبورن ښار کې اوسيده د کورنۍ لخوا يو بل افغان ته په زور ودولو وروسته ادعا کيږي چې وژل شوې.
نن د اسټراليا فدرال پوليسو د روقيه په زور ودولو ته لار هوارولو په جرم درې افغانان دوه ښځې او يو سړی ونيول.
فدرال پوليس ادعا کوي چې درې نيول شوو کسانو د تير کال نومبر مياشت کې ۲۰ کلنه روقيه په زور يو بل افغان محمد عارف حليمي ته واده کړه او د پوليسو ادعا له مخه حليمي له واده څو مياشتې وروسته خپل ميرمن ووژله.
اغلې روقيه له واده مخکې له پوليسو د مرستې غوښتنه کړې وه او په زور ودولو موضوع يې څو وارې له پوليسو سره شريکه کړې وه. د پوليسو په وينا روقيه ته خونديتوب ورکولو وړانديز وشو ولې د کورنۍ فشارونو له امله روقيه واده وکړ او د اسټراليا ويکټوريا ايالت څخه لويديځ ايالت پرت ښار کې يې ژوند پيل کړ.
پوليس ادعا کوي چې د روقيه حيدري خاوند عارف حليمي د روان کال جنورۍ مياشت کې روقيه ووژله.
اسټراليا کې په زور ودونه او د کروني تاوتريخوالي پيښو انديښنې راپارولي، د پوليسو په وينا دا پيښه د انسانانو قاچاق ورته يوه پيښه ګڼل کيږي ځکه دا انجلۍ د خوښې خلاف بل کس ته په زور واده شوې.
پوليس د روقيه خاوند عارف حليمي د قتل په جرم نيولې او روانه مياشت محکمې ته وړاندې کيږي.
يادې پيښې يو ځل بيا پر افغان ټولنې تور داغ پورې کړ.
