د افغانستان او بنګلدېش تر منځ د دریو یو ورځنیو لوبو په وروستۍ لوبه کې هم افغانستان بنګلدېش ته ماته ورکړه او یاده لوبلړۍ یې ۳-۰ په خپل نوم پای ته ورسوله.
افغان لوبډلې د پچې له ګټلو وروسته د ۹ لوبغاړو په سوځېدلو سره په ۵۰ اورونو کې د بنګلدېش لپاره د ۲۹۴ منډو هدف و ټاکه.
په دغه لوبه کې د افغانستان لپاره ابراهیم ځدراڼ یو ځل بیا غوره توپوهنه وکړه او ۹۵ منډې یې جوړې کړې، د نوموړي ترڅنګ محمد نبي ۶۲ او رحمن الله ګربز ۴۲ منډې جوړې کړې.
د توپ اچونې په برخه کې بلال سمیع ۵ او راشد خان ۳ وېکټې ترلاسه کړې.
د بنګلدېش لوبډله د هدف په پوره کولو کې پاتې راغله او ټول لوبغاړي یې په ۹۳ منډو و سوځېدل.
د افغانستان ښي لاسی چټګ توپ اچوونکی بلال سمیع د لوبې غوره لوبغاړی و نومول شو. مګر ابراهیم ځدراڼ د بنګلدېش پر وړاندې د یو ورځنیو سیالیو په لوبلړۍ کې د ۲ نیمه سلیزو پرمټ او ۷۱ منډو په اوسط سره ۲۱۳ منډې جوړې کړې او د یادې لوبلړۍ تر ټولو غوره لوبغاړی ونومول شو.
سره له دې چې افغان لوبډلې په یو ورځنیو نړیوالو سیالیو کې بنګلدېش ته تر دې وړاندې هم ۱۰ ځله ماته ورکړې، خو دا لومړی ځل و چې افغان لوبډله بنګلدېش ته د یو ورځنیو سیالیو د لوبلړۍ په ټولو لوبو کې ماته ورکوي.
د اس بي اس پښتو خپرونه دلته زمونږ پر ویب پاڼه یا هم د اس بي اس پر اپلیکیشن واورئ. تاسو کولای شئ د اس بي اس اپلیکیشن په وړیا توګه له اپل سټور یا ګوګل پلې څخه ترلاسه کړئ.
