د افغانستان د کرېکټ ملي لوبغاړي به نن شپه د روانې درې اړخیزې لوبلړۍ په لړ کې د خپلې دویمې لوبې په موخه د کوربه متحده عربي اماراتو پر وړاندې د سیالۍ ډګر ته ښکته شي.
دغه لوبه د افغانستان په وخت د ماښام ۷ نیمې بجې او د سېډني او ملبورن ښارونو په وخت د شپې په یوه بجه پیلېږي.
د افغانستان کرېکټ بورډ د روانې لوبلړۍ له پیل مخکې ویلي چې افغان لوبډله د دې سیالیو لپاره بشپړ چمتووالی لري.
په دغې لوبلړۍ کې تراوسه د افغانستان، پاکستان او متحده عربي اماراتو ترمنځ یوه یوه لوبه ترسره شوې چې دواړه د پاکستان لوبډلې ګټلې دي.
دغه درې اړخیزه لوبلړۍ داسې مهال ترسره کیږي چې د سپمټبر په ۹مه د اسیا جام سیالۍ هم د اماراتو په کوربتوب پیلیږي چې د همدې میاشتې تر ۲۸مې نېټې به داوم وکړي.
د افغانستان بورډ د اسيا جام لپاره د اګسټ مياشتې په ٢٤مه د راشد خان په مشرې ١٧ کسيزه لوبډله اعلان کړې ده.
افغانستان له هانګ کانګ، بنګله دېش او سریلانکا سره په یو ګروپ کې دي، په داسې حال کې چې په بل ګروپ کې هند، پاکستان، کوربه امارات او عمان شامل دي.
د مهالويش له مخې افغانستان به خپله لومړۍ لوبه د سپټمبر په ٩مه له هانګ کانګ، دویمه د سپټمبر په ١٦ مه له بنګله دېش او وروستۍ سیالۍ به د سپټمبر په ١٨ مه له سريلانکا سره ترسره کړي.
د اس بي اس پښتو خپرونه دلته زمونږ پر ویب پاڼه یا هم د اس بي اس پر اپلیکیشن واورئ. تاسو کولای شئ د اس بي اس اپلیکیشن په وړیا توګه له اپل سټور یا ګوګل پلې څخه ترلاسه کړئ.
