د هېنلي اینډ پارټنرز ادارې د پاسپورټونو په درجه بندۍ کې د سنګاپور پاسپورټ یو ځل بیا د نړۍ تر ټولو با اعتباره او د افغانستان پاسپورټ تر ټولو کم اعتباره پاسپورټ پېژندل شوی دی.
د سنګاپور پاسپورټ لرونکي کولی شي د نړۍ ۱۹۳ هېوادونو ته له ویزې پرته سفر وکړي.
د پاسپورټونو په درجه بندۍ کې د جاپان او سویلي کوریا پاسپورټونو دویم ځای خپل کړی. د دغو هېوادونو اوسېدونکي د نړۍ ۱۹۰ هېوادونو ته بې له ویزې سفر کولی شي.
ډنمارک، فنلنډ، فرانسه، جرمني، ایرلند، ایټالیا او هسپانیه په درجه بندۍ کې درېیم ځای لري. د دغو هېوادونو وګړي کولای شي د نړۍ ۱۸۹ هېوادونو ته له ویزې پرته سفر وکړي.
د هېنلي د پاسپورټونو په درجه بندۍ کې نوي زیلنډ پنځم، انګلستان شپږم او آسټرالیا اووم ځای خپل کړی.
د پاسپورټونو د درجه بندۍ لېست چې د جولای په ۲۲مه نېټه خپور شوی ښيي چې د افغانستان پاسپورټ د ۱۹۹ هېوادونو په لېست کې وروستی ځای خپل کړی.
سره لدې چې د پاسپورټونو په درجه بندۍ کې د افغانستان پاسپورټ د نړۍ تر ټولو کم اعتباره پاسپورټ معرفي شوی، خو د دغه هېواد اوسېدونکي کولی شي د نړۍ ۲۵ هېوادونو ته له ویزې پرته سفر وکړي.
د هېنلي ایند پارټنرز ادارې، دغه لېست د نړیوال هوایی ټرانسپورټ ادارې (IATA) په مرسته برابر کړی دی.
د هېنلې او پارټنرز ادارې د معلوماتو پر اساس د افغانستان او سېدونکي له ویزې پرته لاندې هېوادونو ته سفر کولای شي.
- بنګلدېش
- بروندي
- کمبوډیا
- کیپ ورډ ټاپوګانې
- ډ کومورو ټاپوګانې
- کوک ټاپوګانې
- جی بوتي
- دومینیکا
- ګینه بیسو
- هایټي
- کینیا
- مکاو
- مدګاسکار
- مالدیو
- میکرونیزیا
- موزمبیک
- نیوو
- د پالاو ټاپوګانې
- ساموا
- رواندا
- سیچیلیس
- سومالیا
- سریلانکا
- تیمور - لست
- توالو
دغه معلومات د هینلې او پارټنرز ادارې له وېب پاڼې څخه ترلاسه شوي. د لا ډېرو معلوماتو لپاره مهرباني وکړئ د یادې ادراې له ویب پاڼې څخه لیدنه وکړئ: https://www.henleyglobal.com/passport-index
د اس بي اس پښتو خپرونه دلته زمونږ پر ویب پاڼه یا هم د اس بي اس پر اپلیکیشن واورئ. تاسو کولای شئ د اس بي اس اپلیکیشن په وړیا توګه له اپل سټور یا ګوګل پلې څخه ترلاسه کړئ.
