په اسلام اباد کې یوې ځايي محکمې د یکشنبې په ورځ منلې ترڅو د پاکستان د ملي شورا پخوانی غړی علي وزیر او د بشري حقونو وکیله، ایمان مزاري د غیرقانوني غونډې، مقاومت او "په دولتي چارو کې د لاسوهنې" په تور په توقیف کې وساتل شي.
راپورونه ښيي چې رسنیو ته اجازه نده ورکړل شوې ترڅو محکمې ته دننه شي او له ودانۍ بهر د یو زیات شمېر پولیسو په شتون کې محکمه دایره شوې ده.
محکمې د پولیسو لخوا د ایمان مزاري د یوې ورځې او علي وزیر د دوو ورځو توقیف تایید کړی دی.
د اسلام آباد پولیسو علي وزیر او ایمان مزاري د پښتون ژغورنې غورځنګ په لاریون کې له وینا وروسته نیولي دي. محکمې د پولیسو هغه غوښتنه منلې ترڅو دغه دواړه په توقیف کې وساتي.
د اسلام آباد پولیسو پر خپله ټویټر پاڼه لیکلي چې دواړه پولیسو ته د څېړنې لپاره پکاره وه له همدې امله نیول شوي.
د آګسټ پر ۱۸مه نېټه د پښتون ژغورنې غورځنګ د اسلام آباد په ترنول سیمه کې یوه غونډه نیولې وه، په یاده غونډه کې د پي ټي ام د غړو ترڅنګ د بشري حقونو فعالې او وکیلې ایمان مزاري هم برخه اخیستې وه.
ایمان مزاري، د پاکستان د بشري حقونو د پخوانۍ وزیرې شیرین مزاري لور ده چې د پښتون ژغورنې په ناسته کې یې پر پوځ تندې نیوکې کړي.
ټاکل شوې ترڅو علي وزیر د آګسټ پر ۲۲ نېټه او ایمان مزاري د سپټمبر پر ۲ نېټه محکمې ته وړاندې کړل شي.
