د آسټرالیا لومړي وزیر، انتوني البنیزي د اوکراین له ولسمشر ولادیمیر زیلینسکي سره، کیف ته نژدې له ویجاړو شویو ښارونو څخه لیدنه ترسره کړې.
ښاغلي البنیزي اوکراین ته د سفر پرمهال اعلان کړی چې، آسټرالیا به ۳۴ نور زغره وال ګاډي اوکراین ته ورکړي او د روسیې د سرو زرو واردات به بند کړي.
نوموړي همدا راز ویلي، په ۱۶ نورو روسي وزیرانو یې د سفر بندیزونه لګولی چې په دې سره د آسټرالیا له خوا د ټولو هغو روسي وګړو شمېر چې بندیز پرې لګول شوی ۸۴۳ کسانو ته رسېدلی.
اوکراین ته د سفر پرمهال، لومړی هغه له کیف سره نږدې له بوچا ښار څخه لیدنه ترسره کړې. ښاغلي البنیزي په بوچا ښار کې ویلي:" په بوچا کې نن ما د جنګي جرم ښکاره شواهد ولیدل. خلک باید د خپلو اعمالو حساب ورکړي."
د آسټرالیا لومړي وزیر انتوني البنیزي د اوکراین له ولسمشر ولادیمیر زیلینسکی سره تر دوه ساعته ناستې وروسته د ۱۰۰ میلیونو ډالرو مرسته هم اعلان کړې.
ښاغلي زیلنسکی د مرستې هرکلی کړی، مګر ویلې یې دی، "کله چې تاسو داسې مخالف ولرئ، دا مرستې هېڅکله کافي ندي."
هغه ویلي، ښاغلي البنیزي ته یې وړاندیز کړی ترڅو آسټرالیا "په اوکراین کې د جګړې له پای وروسته، د بیارغونې پروسې کې برخه واخلي" .
د آسټرالیا لومړی وزیر انتوني البنیزي له تېرو څو ورځو راهیسې په اروپا کې دی. د ناټو په ناسته کې له ګډون وروسته، هغه فرانسې ته سفر ترسره کړی او تر هغې وروسته د پولنډ له لارې اوکراین ته تللی.
