د اسټراليا د امامانو شورا اعلان وکړ چې د سه شنبې ورځ چې د جون د مياشتې ۴ نيټه ده د روژې مبارکې مياشتې وروستی (۳۰) ورځ ده او د چهار شنبې ورځ د جون د مياشت ۵ نيټه به د کوچني اختر لومړی ورځ وي.
اسټراليا لومړنی هيواد دی چې د اختر ورځ اعلانوي.
د اسټراليا امامانو شورا او مفتي اعظم پر ټولو مسلمانانو د يووالي او سولې غږ کړی.
د اسټراليا په ګډون د نړۍ يو شمير هيوادونه له نوې ټکنالوژي او هم ستورپوهنې څخه کار اخلي او د يادو وسايلو له لارې مياشت ګوري او د روژې او اختر اعلان کوي.
مسلمانانو کې پر يادې موضوع اختلاف ليدل کيږي، ځکه ځيني مسلمانان پدې اند دي چې مياشت بايد پر خپلو سترګو وليدل شي ولې بيا ځيني نور د نوې ټکنالوژي کارونه سمه بولي او وايي چې له يادو عصري او پر مختللو وسايلو سره دوی په اسانۍ مياشت ليدلی شي.
داچې دا اختلافات لږ شي د نړۍ سترعلما وايي چې دواړه حالتونه د منلو وړ دي.
د امامانو شورا اسټراليا کې او له اسټراليا څخه بهر مسلمانانو ته د اختر د ورځې مبارکي ويلې.
اسټراليا کې مفتي اعظم پر مسلمانانو غږ کړی ترڅو د اسلام ريښتينی او سولې انځور دې خپل ټولنې ته وړاندې کړي.
