د استرالیا د دفاع وزارت د یوې اعلامیې په خپرولو سره ویلي چې تېره ورځ د رابرټسن بارکس له پوځي اډې څخه ۲۷۰ نوي سرتیري افغانستان او منځني ختیځ ته تللي دي.
د استرالیا د دفاع وزیرې، لینډا رینولډز سرتیرو ته په خبرو کې ویلي، پر سرتېرو ویاړي چې خپلې کورنۍ پریږدي او د سیمې او نړۍ د امنیت په برخه کې مرسته کوي.
نوموړې همدا راز د دغو سرتېرو له کورنیو او ملګرو څخه مننه کړې ځکه د دوي له ملاتړ پرته د سرتیرو ماموریت امکان نلري.
د نويو سرتیرو په ډله کې د مخابراتو د برخې ۱۰۰ تنه متخصصین هم شامل دي خو د FPE-12 ډله به په افغانستان کې د هغو ښونکو او سلاکارانو د ملاتړ چارې پر غاړه ولري چې د ناټو غوڅ ملاتړ ماموریت له ځواکونو سره پر دنده بوخت دي.
اوسمهال د استرالیا له ۱۰۰۰ څخه زیات سرتیري په افغانستان او منځني ختیځ کې پر دنده بوخت دي.
شریکول
