د آسټرالیا حکومت په پام کې لري ترڅو د دغه هېواد په وېکټوریا ایالت کې د " ام آر ان اې" واکسین د تولید فابریکه جوړه کړي، ترڅو په راتلونکې کې له وبا سره د مبارزې لپاره دغه هېواد چمتو اووسي.
تمه کېږي چې دغه فابریکه به له ۲۰۲۴ کال څخه په هر کال کې ۱۰۰ میلیونه ډوز واکسین تولید کړي.
د واکسین د تولید نوې فابریکه د آسټرالیا د فدرالي او ایالتي حکومتونو او مډرنا شرکت لخوا په ګډه جوړېږي.
آسټرالیا لومړی وزیر سکاټ موریسن وايي چې د " ام آر ان اې" واکسینونه ثابت شوي چې د کرونا وېروس د ناروغۍ پرمهال تر ټولو لوی ساینسی کشف دی او دا پدې مانا ده چې یاد واکسینونه د راتلونکې مهمه برخه ده، "نه یواځې پدې هېواد کې بلکې په ټوله نړۍ کې."
"نو مونږ پدې اړه پرېکړه وکړه ترڅو ډاډ ترلاسه کړو چې مونږ د دې د تولید وړتیا لرو ... ترڅو آسټرالیایان خوندي وساتو او د دوی روغتیا خوندي کړو، نه یوازې د کووېډ پر وړاندې، بلکې د ډېرو نورو ساري ناروغیو پروړاندې."
د کامن وېلت حکومت د ساینسي او صنعتی څېړنو د مرکز ډاکټر راب کرنفیل وايي چې "مونږ دلته په آسټرالیا کې ډېرې څېړنې کوو، مګر تولیدونکو ته اړتیا لرو چې تولید او توزیع یې کړي".
