آسټرالیا، بریټانیا، کاناډا او پرتګال د فلسطین دولت په رسمیت و پېژنده، تمه کېږي چې یو شمېر نور هېوادونه به هم په راتلونکو ورځو کې دې ته ورته ګام پورته کړي.
د دغو هېوادونو له رسمیت پېژندنې سره د هغو هېوادونو شمېر ۱۵۱ ته رسېدلی چې د فلسطین دولت په رسمیت پېژني.
د آسترالیا لومړي وزیر، انټوني البنیزي، دا اعلان د یکشنبې په ورځ په نیویارک کې وکړ.
ښاغلي البنیزي ویلي: "د آسترالیا مشترک المنافع هېواد د فلسطین دولت په رسمیت پېژني. په آسترالیا کې موږ له اوږدې مودې راهیسې د دواړو سیاسي ګوندونو په همغږۍ د دوه-دولتونو د حل ملاتړ کړی دی. یو له دغو دولتونو څخه، بېشکه، اسرائیل دی، او بل، طبعاً، فلسطین دی."
تمه کېږي چې فرانسه او بلجیم به هم په راتلونکو ورځو کې د فلسطین دولت په رسمیت و پېژني.
د اسراییلو لومړي وزیر بنیامین نتنیاهو د دغې پرېکړې په وړاندې کلک غبرګون ښوولی دی.
نتنیاهو ویلي، اسراییل به هیڅکله د فلسطین دولت ته اجازه ورنکړي.
"زه هغو مشرانو ته یو روښانه پیغام لرم چې د اکتوبر د ۷مې له وحشتناکې وژنې وروسته د فلسطین دولت په رسمیت پېژني: تاسو ترهګرۍ ته لویه جایزه ورکوئ. او زه تاسو ته یو بل پیغام لرم: دا کار به هېڅکله ونه شي. د اردن لویدیځ کې به هیڅ فلسطینی دولت شتون ونلري."
په ملګرو ملتونو کې د فلسطین سفیر ریاض منصور، د فلسطین دولت د رسمیت پېژندنې له څپې هرکلی کړی دی.
هغه په غزې او لویدیځه غاړه کې له خپلو ټاټوبو څخه د فلسطینیانو د هر ډول جبري لیږد مخنیوي پر اهمیت ټینګار کوي.
هغه وايي، باور لري چې د اسراییلو خلک به بالاخره پر خپل حکومت فشار راوړي چې د اوربند په اړه خبرې اترې وکړي.
"سولې ته یو چانس ورکړئ. دا لیونتوب ودروئ. دا نسل وژنه ودروئ، سوله واکمنه کړئ. د فلسطینیانو او اسراییلیانو ژوند وژغورئ. د یرغمل شویو او بندیانو ژوند وژغورئ. سوله د جګړې څخه ډیره ښه ده."
