د استرالیا د کورنیو چارو وزارت لخوا خپرې شوې شمېرې ښيي چې په تېر مالي کال کې د شاوخوا ۱۴۵ زره کسانو د تابعیت غوښتنلیکونه منل شوي دي. دغه شمېرې د ۲۰۱۷-۲۰۱۸ مالي کال په پرتله ۸۰ سلنه زیاتوالی ښيي.
د استرالیا د کډوالو چارو وزارت مسولین وايي، د پخوا په پرتله اوس د تابعیت لپاره سپارل شوي غوښتنلیکونه په کم وخت کې ارزول کېږي. اوسمهال ۷۵ سلنه کسان په ۱۸ میاشتو کې د استرالیا تابعیت ترلاسه کوي خو پخوا به د استرالیا تابعیت لپاره د سپارل شويو غوښنلیکونو کارونه په ۲۰ میاشتو کې پای ته رسیدل.
همدا راز اوسمهال د استرالیا د تابعیت لپاره د ازموینۍ له ترسره کولو وروسته د انتظار موده هم را کمه شوې ده. ځینې راپورونه ښيي، داسې کسان هم شته چې د تابعیت له ازموینې وروسته یې کارونه په یوه ورځ کې پای ته رسیږې.
د استرالیا د کډوالو چارو وزیر، ډېوېډ کولمن وايي، د تابعیت پروسې کې اصلاحات او په انلاین ډول سره د غوښتنلیکونو سپارل د دې لامل کرځیدلي ترڅو د انتظار موده را کم شي او خلک په کم وخت کې د استرالیا تابعیت ترلاسه کړي.
Source: AAP
د استرالیا د تابعیت لپاره ټول غوښتنلیکونه په یوه وخت کې نه ترسره کېږي د ځینو کسانو غوښتنلیکونه کیدای شي له ۱۸ میاشتو په کم وخت کې پای ته ورسیږي خو د ځینو نورو کیدای شي له ۲ کلونو څخه هم زیات وخت ونیسي.
په ۱۹۴۸م کال کې د استرالیا د تابعیت د قانون له تصویب څخه یو کال وروسته د لومړي ځل لپاره د ایتالیا، پولنډ ، یونان ، جرمني او یو شمېر نورو هېوادونو اوسیدونکو د استرالیا تابعیت ترلاسه کړ. د ۱۹۴۹ او ۲۰۱۹ کلونو ترمنځ شاوخوا ۵ میلیونه کډوالو د استرالیا تابعیت ترلاسه کړی دی او دغه لړۍ لا تراوسه دوام لري.
د استرالیا تابعیت یواځې دا مانا نلري چې تاسو په استرالیا کې د استوګنې دایمي اجازه ترلاسه کوی، بلکې د دغه هېواد تابعیت یو شمېر مهمې ګټې هم لري. د بېلګې په توګه، د تابعیت ترلاسه کولو یوه مهم ګټه داده چې تاسو کولای شئ د استرالیا پاسپورټ ترلاسه کړئ او په هغه د نړۍ شاوخوا ۱۷۰ هېوادونو ته له وېزې پرته سفر وکړئ. د سفر د سهولت ترڅنګ که چېرې تاسو په کوم بهرني هېواد کې له کومې ستونزې سره مخ یاست نو د استرالیا حکومت له تاسو سره مرسته وکړي.
شریکول
