په تېرو څو اوونیو کې له ۸۰ زرو څخه زیات کسان د نړۍ په بېلابېلو هېوادونو کې په کرونا ویروس اخته شوي. راپورونه ښيي چې تر دې مهاله تر ټولو زیات کسان په چین هېواد کې په دغه ناروغۍ اخته دي خو یاد ویروس په ډېر تېزوالي سره دخپرېدو په حال کې ده. له چین وروسته په جاپان ، سویلي کوریا، ایټالیا او ایران کې زیات کسان په دغه ناروغۍ اخته شوي.
د کرونا ویروس په تېرو څو اونیو کې شاوخوا ۲ زره کسان وژلي او ۳۳ زره کسان په یاد ویروس له اخته کېدو وروسته بېرته ښه شوي دي. تر دې مهاله څه دپاسه دوه زره او پنځه سوه کسانو په چین کې د کرونا ویروس له امله خپل ژوند له لاسه ورکړی او له چین وروسته کرونا ویروس تر ټولو زیات کسان په ایران کې وژلي چې شمېر یې ۲۲ کسانو ته رسېرې.
په وروستیو څو ورځو کې د کرونا ویروس یوه پېښه په افغانستان او دوه پېښې په پاکستان کې ثبت شوي. د افغانستان او پاکستان د روغتیا چارواکي باور لري چې په یاد ویروس اخته کسانو په ورستیو اونیو کې ایران ته سفر ترسره کړی وه.
Source: SBS
که چېرې تاسو غواړئ، له اسټرالیا څخه بهر سفر وکړئ نو دا مهمه خبره ده ترڅو له سفر مخکې د اسټرالیا د حکومت له وروستیو معلوماتو او مشورو ځان خبر کړئ ترڅو تاسو دخپل بهرني سفر په اړه ښه پریکړه ونیسئ.
د اسټرالیا حکومت ټولو هغو کسانو ته چې جاپان، سویلي کوریا، اندونیزیا، تایلند او ایران ته سفر کول غواړي خبردارۍ ورکړی ترڅو له ډېر احتیاط څخه کار واخلي او یو ځل بیا یادو هېوادنو ته تر سفر مخکې فکر وکړي.
له اسټرالیا څخه بهرنیو هېوادونو ته د سفر پرمهال د احتیاط ترڅنګ دا هم مهمه ده ترڅو د سفر بیمه ترلاسه شي ځکه د بیمې درلودلو پرمهال تاسو کولای شئ د ناروغیو او یا هم د خپل پرواز له لاسه ورکولو پرمهال مالي مرسته ترلاسه کړی. مګر په یاد ولری چې د بیمې له اخیستلو مخکې ځان د بیمي په پالیسۍ سم پوه کړی ترڅو وروسته له ستونزې سره مخ نشئ.
که چېرې تاسو غواړئ، افغانستان یا پاکستان ته سفر وکړئ تر اوسه پورې د اسټرالیا حکومت یادو هېوادونو ته خلک له سفر څخه ندي منع کړي. مګر د کرونا ویروس په ډېر تېزوالي سره د خپرېدو په حال کې ده او ډېر ژر کېدای شي حکومت ځینو هېوادونو ته خلک له سفر څخه منع کړي.
SBS and AAP
