د آسټرالیا فدرالي حکومت په پام کې لري ترڅو د بشردوستانه ویزو شمېر زیات کړي.
د آسټرالیا حکومت د بشردوستانه ویزو لپاره کلنی ټاکل شوی شمېر له شاوخوا ۱۷ زره او ۸۷۵ ویزو څخه ۲۰ زره ویزو ته پورته کړی دی.
د بشردوستانه ویزو شمېر په ۲۰۱۴ کال کې د پخواني لومړي وزیر ټوني ایبټ لخوا کم شوی وه، مګر په تېرو کلونو کې په تدریجې ټول سره په شمېر کې یو څه زیاتوالی راغلی دی.
د آسټرالیا لومړی وزیر انتوني البنیزي وايي چې د بشردوستانه ویزو په شمېر کې ۱۱ سلنه زیاتوالی یو مناسبه ګام دی.
هغه وايي: "موږ نشو کولای هر هغه کس آسټرالیا ته راولو چې غواړي دغه هېواد ته راشي."
"مګر هغه څه چې موږ د یو مسؤل ملت په توګه کولای شو هغه تل یو سخاوتمنده ونډه لوبول دي."
د کډوالو چارو وزیر انډریو کیلز وایي، د ویزو په شمېر کې زیاتوالی به آسټرالیا ته اجازه ورکړي ترڅو په نړیوال بشردوستانه بحران کې مثبت رول ولوبوي.
هغه وايي: "پداسې حال کې چې په نړۍ کې د پخوا په پرتله زیات خلک بې ځایه شوي، د البنیزي حکومت مخ ته کېږي ترڅو د مېشتېدنې په نړیواله هڅه کې په مسئول ډول، رول ولوبوي."
اوسمهال د بشردوستانه ویزو په پروګرام کې هر کال ۱۷ زره او ۸۷۵ کسانو ته ویزې ورکول کېږي چې ۱۳ زره او ۵۷۰ ویزې د اصلي پروګرام برخه ده او ۴ زره او ۱۲۵ بشردوستانه ویزې په کال کې افغانانو ته په پام کې نیول شوي.
د کډوالو پلویانو د حکومت له دغې پرېکړې څخه هرکلی کوي، مګر هیله لري ترڅو دغه شمېرې نورې هم پورته ولاړې شي.
د لیبر ګوند د ټاکنیزو کمپاینونو پرمهال ژمنه کړې وه چې د بشردوستانه ویزو شمېر به ۲۷ زره ته ورسوي. مګر اوسمهال د دغو ویزو شمېر یواځې ۲۰ زره ته پورته کېږي.
