د آسټرالیا د بهرنيو چارو وزيرې، پيني وانګ اعلان وکړ چې د افغانستان له زلزله ځپلو خلکو سره یو میلیون ډالره مرسته کوي او دغه مرستې د هغو ١٤٠ ميليونو ډالرو سربېره دي، چې آسټراليا له افغانستان سره د ۲۰۲۱ کال له سپټمبر مياشتې راهيسې ژمنه کړې ده.
د آسټرالیا د بهرنیو چارو وزرات لخوا په یوې خپرې شوې اعلامیې کې راغلي: "آسټرالیا به د جون د ۲۲ نیټې له ویجاړونکې زلزلې وروسته د افغانستان له خلکو سره د مرستې لپاره د یو میلیون ډالرو اضافي بیړنۍ مرستې برابرې کړي."
"دا د ۲۰۲۱ کال د سپټمبر له میاشتې راهیسې له افغانستان سره د ۱۴۰ میلیونو ډالرو مرستو سربیره ۱ میلیونه اضافي مرسته ده."
د افغانستان په شرقي او جنوبي ولایتونو کې د چهارشنبې د زلزلې له امله د ځپل شویو کسانو شمېر له ۱۰۰۰ کسانو څخه پورته شوی. په یاده زلزله کې یو زیات شمېر کسان ټپیان شوي او په زرهاوو کسانو خپل کورونو له لاسه ورکړي دي.
په آسټرالیا کې مېشت افغانان له زلزله ځپلو سره د مرستې لپاره پیسې را ټولوي ترڅو په افغانستان کې د وروستۍ زلزلې له زخمیانو او د مړه شویو کسانو له کورنیو سره مرستې وکړي.
