په افغانستان کې د ملګرو ملتونو د ادارې لخوا په یوې خپرې شوې اعلامیې کې راغلي چې تېرکال د جګړې پرمهال په افغانستان کې لس زره او ۳۹۲ کسانو ته مرګ ژوبله اوښتې. اعلامیه زیاتوي، په ۲۰۱۹ کال کې درې زره او ۴۰۳ ملکي وګړي وژل شوي او شاوخوا ۷ زره نور ټپیان شوي دي.
په افغانستان کې د ملګرو ملتونو مرستندویه ماموریت یوناما وايي، د ۴۹ سلنه ملګي وکړو د مرګ ژوبلې مسولیت د حکومت د وسله والو مخالفینو او د ۴۳ سلنه هم د حکومت پلوه ځواکونو پر غاړه دی.
د ملګرو ملتونو د بشري حقونو ادارې، په خپله ټویټر پاڼه لیکلي چې، دا په پرله پسې توګه شپږم ځل دی چې په یوه کال کې له ۱۰ زره څخه زیاتو ملکي وګړو ته مرګ ژوبله اوړي. د ملکي وګړو د مرګ ژوبلې په اړه د دغې ادارې په خپاره شوي ګراف کې لیدل کېږي چې د ۲۰۱۸ کال پر پرتله د ملګي وګړو په مرګ ژوله کې ۵ سلنه کموالی راغلی.
یوناما دغه اعلان په داسې حال کې کړی چې ټاکل شوې ترڅو د روانې فبروری میاشتې په ۲۸ نېټه د امریکا او طالبانو ترمنځ د سولې تړون لاسلیک شي.
