د طالبانو د بهرنیو چارو وزارت تېره ورځ د یوې اعلامیې په خپرولو سره په اروپا، کاناډا، متحده ایالتونو او آسټرالیا کې د افغانستان د سیاسي استازولیو لخوا د قونسلي خدمتونو وړاندې کول بې اعتباره اعلان کړل.
د طالبانو د بهرنیو چارو وزارت لخوا په یوې خپرې شوې اعلامیې کې راغلي چې " د یادو سندونو په وړاندې هېڅ ډول مسوولیت نه لري او نه اجراآت پرې ترسره کیږي."
"بهر مېشتي هېوادوال او بهرنیان کولای شي د افغانستان له پورتنیو استازولیو پرته په نورو هېوادونو کې د افغانستان اسلامي امارت استازولیو ته د قونسلي خدمتونو او ویزو تر لاسه کولو لپاره مراجعه وکړي."
د طالبانو دغې اعلامیې ته په ګڼو هېوادونو کې د افغانستان سیاسي نمایندګیو غبرګون ښوولی دی.
په آسټرالیا کې د افغانستان سفارت نن سهار پر خپله فېسبوک پاڼه د قونسلي خدمتونو د وړاندې کولو د تداوم په هکله یوه اعلامیه خپره کړې ده.
د سفارت پر فېسبوک پاڼه خپره شوې اعلامیه په اصل کې د افغانستان د اسلامي جمهوریت د ټولو سیاسي او قونسلي نمايندګيو د همغږی شورا کډه اعلامیه ده.
په خپرې شوې اعلامې یې راغلي: "د افغانستان سیاسي او قونسلي نمایندګیو، په تېرو دریو کلونو کې د ځانګړي او استثنايي وضعیت په پام کې نیولو سره ځان مکلف بللی چې، د هیواد د ملي او د افغانانو د ګټو په رڼا کې او همدا راز د نړیوالې ټولنې او کوربه هېوادونو له دریځ سره سم، ټولو افغانانو ته قونسلي خدمات رواندي كوي."
"دا خدمات د ملي قوانينو او نړيوالو مقرراتو په رعایت، بشپړې روڼتیا او امانت دارۍ او د کوربه هیوادونو د اړوندو ادارو سره په همغږۍ او د افغانستان د اسلامي جمهوريت د مشروعیت او اعتبار پر بنسټ ترسره شوي او ترسره کېږي."
"په اروپايي هېوادونو، کاناډا، آسټراليا او نورو هیوادونو کې د افغانستان سياسي او قونسلي نمايندګۍ د دې په پام کې نیولو سره چې د دوی ډېری قونسلي خدمات د کوربه هېوادونو اړوندو ادارو پورې تړاو لري، د ملي قوانينو او نړيوالو مقرراتو په چوکاټ او د کوربه هیوادونو ادارو سره د نږدې پوهاوي او همغږي له لارې د تېر په څېر د قونسلي خدماتو دوام ته ژمن دي."
اس بي اس د آسټرالیا د بهرنیو چارو وزارت سره د نظر لپاره اړیکه نیولې، خو تر دې دمه یاد وزارت نظر ندی شریک کړی.
شریکول
