پاکستان کې په کرونا وېروس د اخته کسانو د شمېرو له زیاتوالي سره د دغه هېواد یو زیات شمېر سیاسي مشران هم په کوېډ – ۱۹ ناروغۍ اخته شوي دي. د پاکستان د اکسپریس ټریبیون ورځپانې په یوه خبر کې راغلي چې تردې دمه د دغه هېواد د پارلمان نږدې ۱۰۰ غړي په کرونا وېروس اخته شوي او تر درملنې لاندې دي.
د پاکستان د ساینس او ټکنالوژۍ وزیر فواد چوهدري، رسنیو سره په خبرو کې ویلي چې د دغه هېواد د ولسي جرګې له ۳۴۲ غړو څخه نږدې ۱۰۰ کسان په کرونا وېروس اخته شوي. د اخته کسانو په ډله کې د پاکستان د مسلم لیګ نواز ګوند مشر ، شهباز شریف نوم هم لیدل کېږي.
د تېرې مې میاشتې په ۹ نېټه د پاکستان حکومت په دغه هېواد کې محدودیتونه کم کړل چې تر هغې وروسته د اخته کسانو شمېرې په چټکۍ سره زیاتې شوې. اوسمهال په پاکستان کې په کرونا وېروس د اخته کسانو شمېر شاوخوا ۱۲۰ زره کسانو ته رسیدلی او تر دې دمه ۲۳۵۶ کسانو خپل ژوند له لاسه ورکړی او شاوخوا ۳۸ زره کسان بېرته ښه شوي.
