د آسټرالیا په وېکټوریا ایالت کې په کرونا وېروس د اخته کسانو شمېرې یو ځل بیا د زیاتېدو په حال کې دي. د وېکټوریا ایالت مسولینو له رسنیو سره په خبرو کې ویلي چې په ۲۴ ساعتونو کې د کرونا وېروس ۴۲۸ نوې پېښې په دغه ایالت کې ثبت شوي.
د وېکټوریا ایالت مشر، ډنیل انډریوز خبریالانو ته ویلي چې په دغه ایالت کې دریو کسانو د کرونا وېروس له امله خپل ژوند له لاسه ورکړی.
تر دې دمه په وېکټوریا ایالت کې له ۵ زره څخه زیات کسان په کرونا وېروس یا کووېډ-۱۹ ناروغۍ اخته شوي چې شاوخوا ۲۵۰۰ ناروغ کسان بېرته ښه شوي او پاتې نور تر درملنې لاندې دي.
په وېکټوریا ایالت کې د سلګونه نویو پېښو له ثبت وروسته ویل کېږي چې محدودویتونه ممکن نور هم زیات شي. اوسمهال د یاد ایالت په ملبورن ښار کې دریمه درجه محدودیتونه وضع شوي ترڅو د وېکټوریا ایالت نورو سیمو ته د کرونا وېروس د خپرېدو مخنیوی وشي.
له وېکټوریا ایالت وروسته اوس په نیوساوت وېلز ایالت کې هم وضعیت
د اندېښنې وړ بلل کېږي، مګر په تېرو ۲۴ ساعتونو کې په دغه ایالت کې
د کرونا وېروس ۸ نوې پېښې ثبت شوي.
په وېکټوریا ایالت کې د نویو پېښو له ثبت سره په ټوله آسټرالیا کې
د اخته کسانو شمېرې ۱۱۲۳۳ ته رسېدلې او تر دې مهاله ۱۱۶ کسانو
د کرونا وېروس له امله خپل ژوند له لاسه ورکړی.
