څلور ورځې وړاندې د کرېکټ د نړیوالې شورا د مشر ګرېک بارکلې دنده پای ته ورسېده او د هند جې شاه د نوي مشر په توګه خپله دنده پیل کړه.
د دندې له پای ته رسېدو وروسته، ګرېک بارکلې د انګستان له ټلګراف سره په مرکې کې د آسټرالیا په کرېکټ بورډ له افغانستان سره د لوبو د لغوه کولو له امله نیوکه کړې.
هغه ويلي، که چېرې آسټرالیا غواړي سیاسي پیغام واستوي، نو بیا دې په نړیوال جام کې هم له افغان لوبډلې سره نه لوبېږي.
د ښاغلي بارکلې له دغو څرګندونو وروسته، د آسټرالیا د کرېکټ بورډ مشر مایک بیرډ، د افغانستان په اړه پر خپل دریځ نیوکې رد کړي دي.
آسټرالیا په ۲۰۲۱ کال کې د طالبانو له بیا واکمنېدو او د سپورټ په برخه کې پر ښځو له بندیز وروسته له افغانستان سره په دوه اړخیزو سیالیو کې له لوبېدو ډډه کړې ده.
سره له دې چې آسټرالیا، د افغانستان له ملي لوبډلې سره په دوه اړخیزو سیالیو کې له لوبېدو ډډه کوي، مګر بیا هم د کرېکټ نړیوالې شورا په سیالیو کې له افغانستان سره لوبې ترسره کوي.
ښاغلی بیرډ وايي، د آسټرالیا کرېکټ بورډ په خپل دریځ ولاړ دی.
هغه زیاتوي: "موږ په خپل هغه دریځ ډېر ویاړو چې نیولی مو دی او موږ د افغان ښځینه کرېکټ ټیم او هغو غړو ملاتړ کوو چې لا هم دلته دي."
"خلک مختلف نظرونه لري، مګر موږ په خپل نیول شوي دریځ کې ډېر راحته یو."
د آسټرالیا کرکټ بورډ د طالبانو د واکمنۍ پر مهال په افغانستان کې د ښځو او نجونو د بشري حقونو د وضعیت له امله افغان ملي لوبډلې سره درې ځله دوه اړخیزې لوبې لغوه کړي دي.
مګر د آسټرالیا کرېکټ بورد وايي، په دغه هېواد کې د افغانستان د ښځینه کرېکټ ټیم ملاتړ کوي.
ټاکل شوې ترڅو د آسټرالیا د کرېکټ بورډ په ملاتړ د افغانستان د ښځینه کرېکټ لوبغاړې د ۲۰۲۵ کال د جنورۍ په ۳۰مه نېټه د " بې پولې کرېکټ" لوبډلې سره په ملبورن کې لوبه ترسره کړي.
شریکول
