تېره ورځ د استرالیا د فدرال حکومت لخوا د نوي مالي کال لپاره بودیجه اعلان شوه چې د استرالیا د اصلي اوسیدونکو ترڅنګ به پر نویو ګډوالو هم اغېز ولري. د استرالیا لومړي وزیر سکاټ موریسن د اس بي اس شبکې له پنجابي خپرونې سره په خبرو کې ویلي چې ، نوي کډوال هم په استرالیا کې مالیه ورکوي، روغتونونو ته ځي او له روغتیایي خدمتونو څخه ګټه پورته کوي نو ځکه د بودیجې بدلونونه به د نورو په څېر پر دوی هم اغېز ولري.
د فدرال حکومت لخوا د ۲۰۱۹ کال په اعلان شوې بودیجې کې داسې ځینې بدلونونه هم راغلي چې د کډوالو د راتګ په شمېر او شته سهولتونو مستقیم اغیز لري. د بیلګې په توګه تر دې وروسته به په راتلونکو څلورو کلونو کې د ۱۹۰ زره ګډوالو پر ځای هر کال ۱۶۰ زره ګډوالو ته د استرالیا ویزه وروکول کیږي چې له دې ډلې څخه به شاوخوا ۱۰۸ زره کسان د مهارت او شاوخوا ۴۷ زره کسان په فامیلي ویزو استرالیا ته کډوالیږي.
د ویزو په شمېر کې د کموالي ترڅنګ د استرالیا حکومت د وېزو لپاره په ټاکل شوي فیس کې ۵.۴ سلنه زیاتوالی راوستلی چې له دې برخې به حکومت په راتلونکو څلورو کلونو کې ۲۷۵ میلیونه ډالره ګټه ترلاسه کړي خو د راتلونکي ۲۰۲۰ کال د کرېکټ سیالیو د ټولو ګډونوالو د ویزو فیس به معاف شي چې ۱.۳ میلیونه ډالره اټکل شوی دی.
ددې لپاره ترڅو نوي کډوال د استرالیا د لویو ښارونو پرځای په کوچنیو ښارونو کې ځای پرځای شي، حکومت د راتلونکي مالي کال په بودیجې کې ۵۰ میلیونه ډالره په پام کې نیولې ترڅو په یادو سیمو کې په صحیح ډول سره نویو کډوالو ته اسانتیاوې برابرې شي. د ۲۰۱۹ کال له نومبر میاشت وروسته کډوال کولای شي د کار دوه ډوله نویو ویزو ته هم خپل غوښتلیکونه وسپاري چې د ویزې له ترلاسه کولو وروسته باید د استرالیا د لویو ښارونو پر ځای نورو سیمو ته ولاړ شي او هلته ژوند وکړي.
د راتلونکي کال په مالي بودیجې کې حکومت پریکړه کړې ترڅو نوي کډوال د ۶ میاشتو پرځای د کډوالۍ لومړۍ ۱۲ میاشتې په استرالیا کې انګلیسي ژبه زده کړي او خپل نوی ژوند پيل کړي چې لدې کار سره به حکومت ته نیږدې ۷۸ میلییونه ګټه ورسېږي خو د کډالو پلویان له حکومت څخه غوښتنه لري ترڅو دغه پیسې بیرته په داسې برخو کې ولګوي ترڅو کډوال ته یې ګټه ورسېږي. همدا راز د ۲۰۱۹ کال په بودیجې کې حکومت ۶۴ میلیونه ډالره په استرالیا کې د مېشتو کډوالو لپاره ځانګړي کړي ترڅو په ټولنه کې د کډوالو د ځای پرځای کېدو او یوالي په موخه وکارول شي.
