د آسټرالیا د ټاکنو خپلواک کمیسیون نن (دوشنبه) له غرمې وروسته، د لویدیځې آسټرالیا د ګټونکو سناتورانو نومونه اعلان کړل. د کټونکو نوماندانو په لیست کې د آغلې پیمان نوم هم لیدل کېږي.
د روان کال په ټاکنو کې ۶ کسانو له لویدیځې آسټرالیا څخه مشرانو جرګې ته لاره پیدا کړې چې د آغلې پیمان په شمول درې تنه یې د لیبر ګوند غړي دي.
آغلې پیمان هم پر خپله فیسبوک پاڼه د بریا خبر تایید کړی دی.
"موږ وګټله!!!"
"زه په ویاړ سره اعلان کوم چې زه په رسمي توګه د لویدیځې آسټرالیا لپاره د سناتورې په توګه ټاکل شوې یم."
"ستاسو د مینې او ملاتړ لپاره له ټولو مننه!"
د سفارت پر فیسبوک پاڼه په یوه خپاره شوي پیغام کې راغلي: "په خوښۍ سره مو خبر ترلاسه کړ چې فاطمه پیمان چې یوه افغانه کډواله ده او اوس د آسټرالیا تابعیت لري، د آسترالیا پارلمان د مشرانو جرګې ته لاره پیدا کړې ده."
د رسنیو لخوا خپاره شوي مالومات (معلومات) ښيي چې فاطمه پیمان په اصل کې د افغانستان ده او په ۲۰۰۳ کال کې له خپلې کورنۍ سره آسټرالیا ته کډواله شوې. نوموړې اوسمهال د آسټرالیا تابعیت لري او پرت ښار اوسېدونکې ده.
