د آسټرالیا د هوا پېژندنې ادارې خبرداری ورکړی چې په شمالي سیمې، کوینزلنډ او لویدیځې آسټرالیا کې به د تودوخې درجه له ۴۰ درجو پورته واوسېږي.
وړاندوینه شوې چې د لویدیځې آسټرالیا په ماربل بار سیمه کې به نن تودوخه ۴۶ درجو ته ورسېږي. مګر په یاده سیمه کې د آر اس ال لخوا د ۵۱ درجې ګرمې وړاندوینه شوې ده.
د تودوخې د سختې څپې اخطارونه د پورتنۍ برخې لپاره، او همدارنګه د شمالي کوینزلینډ او تیوي ټاپوګانو په شمالي سیمو کې د ځینو برخو لپاره صادر شوي.
په نیو ساوت وېلز او سویلي آسټرالیا کې د ټیټ شدت تودوخې څپې وړاندوینه شوې ده.
په داسې حال کې چې په شمالي سیمو کې خلکو ته د تودوخې د څپې په اړه خبرداری ورکړل شوی، د سویلي کوینزلینډ اوسېدونکو ته ویل شوي ترڅو د طوفان لپاره تیاری ولري.
د آسټرالیا د هوا پېژندنې ادارې د دوشنبې په سهار خبرداری ورکړ چې په ځینو سیمو کې شدید اورښتونه د خطرناک او ژوند ګواښونکي سیلاب لامل کیدی شي.
د نیو ساوت وېلز ایالت شمال ختیځو سیمو ته هم د شدید باران او سیلاب په اړه خبرداری ورکړل شوی دی.
د تودې هوا او سیلابونو د خطر ترڅنک، په اوبو کې د ډوب شویو کسانو د شمېر د زیاتوالي په اړه هم اندېښنې په زیاتېدو دي.
تېره دوځ د پرت ښار د سوان په نامه سیند کې دوه تنه ماشومان ډوب شوي دي. د دغو ماشومانو له ډوبېدو سره په ډسمبر میاشت کې د ډوب شویو کسانو شمېر له ۳۰ څخه پورته شوی.
د تېرو کلونو آمار ښيي چې هرکال د ډوب شویو کسانو له ډلې څخه ۲۵ سلنه د کرېسمس او نوي کال ترمنځ په یوې اوونۍ کې ډوبېږي.
ژوند ژغورونکي له آسټرالیایانو څخه غواړي ترڅو د لامبو پرمهال له احتیاط څخه کار واخلي.
زموږ خپرونه دلته زمونږ پر ویب پاڼه یا هم د اس بي اس پر اپلیکیشن واورئ. تاسو کولای شئ د اس بي اس اپلیکیشن په وړیا توګه له اپل سټور یا ګوګل پلې څخه ترلاسه کړئ.
شریکول
