د آسټرالیا د بهرنیو چارو وزارت، په ختیځو ولایتونو کې له مرګونې زلزلې وروسته د افغانستان له خلکو سره د یو میلیون ډالر مرستې اعلان کړی دی.
د بهرنیو چارو وزارت په اعلامیې کې راغلي چې زلزلې په افغانستان کې روان بشري بحران "لا پسې خراب کړی" دی.
په اعلامیې کې راغلي: "زموږ فکرونه د دې غمجنې زلزلې له قربانیانو، د هغوی له کورنیو، عزیزانو او په آسټرالیا کې د افغانستان له ټولنې سره دي."
"د آسټرالیا مرستې به د افغانستان د بشري مرستو صندوق (AHF) له لارې ترسره شي، چې د ملګرو ملتونو د بشري چارو د همغږۍ دفتر (OCHA) لخوا رهبري کیږي."
"آسټرالیا د ملګرو ملتونو د OCHA په څیر تاسیس شویو شریکانو سره کار کوي ترڅو ډاډ ترلاسه شي چې زموږ ملاتړ اړمنو خلکو سره مرسته کوي، نه د طالبانو له رژیم سره."
اعلامیه زیاتوي چې د آسټرالیا حکومت"د افغانانو ملاتړ ته په کلکه ژمن دی" او له ۲۰۲۱ کال راهیسې یې د افغانستان له خلکو سره "له ۲۶۰ میلیونو ډالرو " ډېره مرسته کړې ده.
په همدې حال کې په آسټرالیا کې مېشتو افغانانو هم له زلزله ځپلو سره د مرستې لپاره هڅې پیل کړي دي.
د اس بي اس پښتو خپرونه دلته زمونږ پر ویب پاڼه یا هم د اس بي اس پر اپلیکیشن واورئ. تاسو کولای شئ د اس بي اس اپلیکیشن په وړیا توګه له اپل سټور یا ګوګل پلې څخه ترلاسه کړئ.
