مهم ټکي:
- د ۲۰۲۱ کال د آګسټ له ۱۷ نېټې څخه د ۲۰۲۲ کال د نومبر تر ۲۵ نېټې پورې، ۳۷ زره او ۲۳۳ غوښتنلیکونه د بشردوستانه ویزو لپاره سپارل شوي.
- د کورنیو چارو وزارت وایي، ۹۳ سلنه هغه غوښتنلیکونه یې ثبت کړي چې د دغه وزارت د بشردوستانه ویزو د ارزونې ځانګړي مرکز ته استول شوي.
- د ۲۰۱۳ کال له جولای میاشتې راهیسې، له ۱۶ زره او ۵۰۰ څخه زیات افغانان د بشردوستانه ویزو پروګرام له لارې آسټرالیا ته راغلي دي.
- د ۲۰۲۱ کال د جولای له لومړۍ نیټې څخه د ۲۰۲۲ کال د اکتوبر تر ۳۱ نیټې پورې، د کورنیو چارو وزارت ۲۴۴۳ افغان اتباعو ته فامیلي ویزې ورکړې.
د روان کال په آګسټ میاشت کې د آسټرالیا حکومت ویلي وه چې د جمهوریت له سقوط وروسته، شاوخوا ۲۱۴ زره افغانانو بشردوستانه ویزو لپاره غوښتنلیکونه سپارلي او یواځې ۶۴۰۰ کسانو ته ویزې ورکړل شوي دي.
مګر د کورنیو چارو وزارت پر ویب پاڼه وروستي معلومات ښيي چې د بشردوستانه ویزو لپاره د سپارل شویو غوښتنلیکونو شمېر تر پخوا ډېر کم دی.
خپاره شوي معلومات ښيي، له څېړنو وروسته، هغه غوښتنلیکونه له لیست څخه ویستل شوي چې تکراري وه او د نورو هېوادونو د اوسېدونکو لخوا سپارل شوی وه.
وروستي معلومات ښيي چې د ۲۰۲۱ کال د آګسټ له ۱۷ نېټې څخه د ۲۰۲۲ کال د نومبر تر ۲۵ نېټې پورې، ۳۷ زره او ۲۳۳ غوښتنلیکونه د بشردوستانه ویزو لپاره سپارل شوي.
په سپارل شویو غوښتنلیکونو کې ۱۷۳ زره او ۸۱۳ افغانانو ته د بشردوستانه ویزو غوښتنه شوې ده.
د سپارل شویو غوښتنلیکونو له ډلې څخه ۳۰ زره ۷۳۹ غوښتنلیکونه تایید او ثبت شوي دي، مګر د ۲ زره او ۲۰۹ غوښتنلیکونو د ثبت کار تر اوسه پاتې دی.
د کورنیو چارو وزارت وایي، ۹۳ سلنه هغه غوښتنلیکونه یې ثبت کړي چې د دغه وزارت د بشردوستانه ارزونې ځانګړي مرکز ته استول شوي.
په آګسټ میاشت کې د کورنیو چارو وزارت ویلي وه چې ۶۴۰۰ کسانو ته یې بشردوستانه ویزې ورکړي، مګر دا چې په وروستیو څو میاشتو کې څومره نورې بشردوستانه ویزې افغانانو ته ورکړل شوي پدې اړه دقیق معلومات ندي خپاره شوي.
اس بي اس پښتو راډیو د کورنیو چارو له وزارت څخه غوښتنه کړې ترڅو د ویزو د شمېر په اړه وروستي معلومات شریک کړي، مګر د کورنیو چارو وزارت تر اوسه دغه معلومات له اس بي اس سره ندي شریک کړي. د آسټرالیا د کورنیو چارو وزارت له معلوماتو وروسته به اس بي اس له تاسو سره د ویزو د شمېر په اړه وروستي معلومات شریک کړي.
Credit: Department of Home Affairs
"د ۲۰۱۳ کال د جولای له لومړۍ نیټې راهیسې، د بشردوستانه پروګرام له لارې له ۱۶۵۰۰ څخه زیاتو افغانانو ته ویزې ورکړل شوې دي."
"هغه کسان چې په خطر کې دي او د ویزو شرایط پوره کوي، ژر تر ژره به په آسټرالیا کې استوګن شي."
د افغانستان د اوسېدونکو لپاره د ۳۱،۵۰۰ اعلان شویو ویزو له ډلې څخه ۲۶ زره او ۵۰۰ ویزې د بشردوستانه او پاتې ۵ زره ویزې د فامیلي پروګرام له لارې افغانانو ته ورکول کېږي.
د کورنیو چارو وزارت معلومات ښيي چې د ۲۰۲۱ کال د جولای له لومړۍ نیټې څخه د ۲۰۲۲ کال د اکتوبر تر ۳۱ نیټې پورې، د کورنیو چارو وزارت ۲۴۴۳ افغان اتباعو ته فامیلي ویزې ورکړې، چې زیاتره یې هغو کسانو ته ورکړل شوي چې واده یې کړی او یا هم غواړي واده وکړي.
زمونږ خپرونه دلته زمونږ پر ویب پاڼه یا هم د اس بي اس پر اپلیکیشن واورئ. تاسو کولای شئ د اس بي اس اپلیکیشن په وړیا توګه له اپل سټور یا ګوګل پلې څخه ترلاسه کړئ.
